兔年來臨，象徵着一年一度的保安禮貌大賽正式展開，屋苑會突然出現很多從未見過的保安，讓你每次回家都倍感安全！網上近日瘋傳圖片，顯示上水有屋苑管理處發通告，表示「嚴禁員工向住戶索取過節賞錢」，住戶如被保安員逗利市，可記下對方姓名等資料向服務處舉報。

網民大讚管理公司做得好，「應該要制止啦，保安企正喺個門口度係咁講『恭喜發財』，保安主任帶頭，好似劫匪咁」、「平時得一個保安，新年我樓下多幾個保安坐陣打招呼」。

然而，大部分人認為通告沒實際作用，保安總有方法令住戶「自動自覺」，而且通告只是說不能討，沒說不能收，「唔畀嚟緊呢年無門口入」、「佢自己畀就ok」、「個客自己隊畀我咋」、「一路跟住個客講『新年快樂』」、「冇話唔畀講『恭喜發財』呢句暗號」、「自己撳密碼開門啦Ｘ頭」。

有網民在facebook群組分享，有人4年無當長工，做保安散工也儲到100萬元，引起網友熱烈估計對方如何積小成多變百萬富翁。相片中見到本月11日做半年定期的銀行單，存款為1000000元，利率5.25厘，7月到期時的利息為26034.24大元。

數口精的網民連隨計數，指「4年儲100萬，即一年25萬，一個月2萬」、「30日，佢星期六日做埋，一日搵八舊」、「如果凈儲100萬，每月唔食唔住要儲20833元x48月，咁炒散+保安應該要接近35000元先生活到」、「如果你話你住屋企食屋企，搵25000元一個儲20000元洗5000元，好好恆心儲4年，都好勉強講得通」。

有人續指「一年儲25萬，當佢係公屋仔好慳洗，一年要搵35萬先圍到皮，一係每日煙駁煙咁返兩份先至有咁嘅可能......但好肯定咁返法一定辛苦過做長工」、「返兩份保安，24小時賺錢」。有網友仔細計算，「如果佢2000蚊真係一個月嘅都可以，佢儲嘅起碼係15000蚊以上一個月，4000蚊就係家用，當佢住公屋1500蚊租，水電煤全部夾埋700蚊，上網費300蚊，即係2500蚊，跟住行路返工，一日三餐1500蚊咁咪可以1個月儲15000蚊」。

再有網民估計其生活細節，「住屋企畀2000元家用包埋佢食，每月基本支出主要咪車費電話上網費呢d，加埋呢幾年疫情根本就無娛樂有咩出奇」，有人則提醒「炒散唔代表係兼職，分別只係工資計日薪，而家好興經中介公司請人，中介公司網絡大，真係可以日日有工開」、「都有可能嘅！同屋企人住，唔駛上繳，唔出街，唔拍拖」、「如果長期開足工，一個月儲兩萬係有可能，最緊要忍到手放棄所有享樂」。

因此有網友認為「做防疫保安是有可能」、「好多嘢事在人為，看更好處係仲可以屋企附近做，車錢都慳返」。

見到如此好景，網民紛「求介紹」，問「邊間公司咁好，我都轉行啦」。不過有人錯重點，反問「依家定期有5.25厘咁高？」