近日，有沙田第一城街坊在facebook專頁分享屋苑的「送貨臨時暫泊許可證」，稱收到不少「城友」（住戶）反映，指許多送貨員拒絕上樓，要求住戶落樓交收，理由是「唔少送貨司機託詞話第一城鎖車勁」。專頁解釋，第一城管理公司百得物業，其實一直有向送貨到商舖及住宅的司機提供送貨暫泊許可證，「限時20分鐘，只要跟足規矩，送貨時提供送貨單做登記，係唔會俾人鎖車」，並附上一張暫泊證樣本，方便眾住戶和送貨司機溝通。照片所見，暫泊證上要寫明申請人及字、車牌、送貨單位等基本資料，另外要檢視送貨單，由發證保安員寫下編號及簽署，下方要填發證時間，再用大字列明「限時20分鐘」。

不少人直指司機去申請暫泊證已經會被鎖車，「首先要泊低架車喺管理處門口，當入去申請嗰一刻，鎖車隊已經做咗嘢」，「我見過搭棚車打去管理處申請咗都俾人鎖」，批評住戶既要有正常服務又要讓管理公司鎖車，「點解你哋啲住戶唔自己檢討下？老實講同區九肚山啲豪宅都冇你哋第一城咁麻煩咁大支嘢」

網民認為「第一城嘅單一律踢，又唔係唔做無飯開，點解要搵自己嚟搞」，送貨司機一入去「做完唔止無飯開仲要嘔突」、「所有快遞及騎手應該統一戰線，第一城永不接單」。有送貨業人士稱早已知道有暫泊證，但聽過有司機老實去申請，「攞到張許可證返嚟見到鎖車，之後照鎖，佢哋話：咁你係鎖車嗰刻無許可證」、「我親身經歷，鎖車紙同暫泊證寫嘅係同一時間，要求管理處開鎖，佢哋都唔肯開鎖」、「我講返我經歷，當時我跟佢規矩去登記寫紙仔，出返嚟已經睇住佢鎖，不過我好好，等佢鎖完先叫佢解鎖」。

有留言認真解釋，送貨員時間就是金錢，每送1單都要去申請很浪費時間，「送貨幾分鐘嘅時間。揸車去41座排隊搞張form唔知幾多分鐘。揸返架車去其他座數又用咗10幾分鐘」、「10多年前去送貨，只要打去管理處報車牌就掂，而家停一停都唔敢諗，多多錢都唔想做」。

近日，有網民在Facebook發文，，他途經沙田第一城1間學校時，發現有校巴被鎖車，他指出「司機伯伯話，我入學校用廁所啫！」他說，司機泊在接送學生的學校門口，有便意沒理由不入學校用廁所，猜測「可能年紀大，小便時間要多點！」。不過他未有交代司機最終是否需要付320元開鎖費，還是獲通融。

有網民慨嘆，「唉，阿伯好慘，搵食啫，唔通叫佢喺車解決」，不少人紛紛批評鎖車隊及遷怒第一城業主，「鎖車鎖上癮」、「鎖車鎖到走火入魔了連校車都鎖」、「真係六親不認」、「第一城啲業主都唔出聲，有份分㗎？」。

有網民氣憤地建議「玩大佢」藉以施壓，「唔好開車呀！畀學校施壓第一城」、「慢慢玩，玩到無車接放學，畀多啲錢拖走更好，明天更無車返學，等家長向學校投訴，學校向返第一城反映」、「玩大啲，遲下咪校車都唔好入第一城，要老師自己出路口帶學生入去囉」。

有網民無奈揶揄，「就嚟連學生都唔車」、「係咪無去管理處申請20分鐘接放學呀？」、「每程校車加價$320」、「預見成人尿片的需求増加」、「遲啲停紅燈都鎖你車」、「希望第一城鎖車隊一視同仁，下次鎖救護車消防車畀個like佢」。