【港人外游/港人去日本/日本旅游/福冈旅游】福冈县政府宣布由2026年7月7日起，推出「Go！Fukuoka」住宿补助计划，对象系所有访日外国旅客，当然包括香港人。只要入住福冈市及北九州市以外嘅住宿，经指定海外订房网站预订，每人每晚即可获3,000日圆（约160港元）折扣，连住多晚亦会逐晚计算。活动总预算约2.3亿日圆，预计可供7.7万人次受惠，名额有限，额满即止！
福冈县Go！Fukuoka推每晚3000日圆住宿补助
据福冈县数据，约82%访日旅客住宿集中喺福冈市，北九州市占约9%，其余地区加埋都唔够一成。县政府希望透过补贴，吸引旅客走入太宰府、柳川、糸岛、原鹤温泉等周边地区，同时分散旅客过度集中嘅问题。
边度用得着福冈住宿补助？
补助只适用于福冈市及北九州市以外嘅住宿设施。换句话说，博多、天神、小仓一带嘅酒店唔适用。以下系几个热门替代地区，由博多出发车程大多约一小时内：
| 地区 | 特色 | 由博多出发交通 |
|---|---|---|
| 太宰府市 | 太宰府天满宫、九州国立博物馆 | 西铁约30分钟 |
| 柳川市 | 柳川游船、鳗鱼蒸笼饭 | 西铁约50分钟 |
| 糸岛市 | 海岸咖啡店、日落靓景 | JR筑肥线约40分钟 |
| 原鹤温泉 | 筑后川畔温泉旅馆 | 高速巴士约1.5小时 |
| 八女市 | 八女茶产地、传统町屋街道 | 高速巴士约1小时 |
点样拎到每晚3,000円折扣？（3大步骤）
Step 1：选择指定订房网站
福冈县官方只指定以下3个海外订房平台：折扣：
| 订房网站 | 折扣开始日期 |
|---|---|
| Agoda | 2026年7月7日起 |
| Trip.com | 2026年7月15日起 |
| Expedia | 2026年7月下旬起 |
小贴士：如果你7月初出发，Agoda系目前唯一用得着折扣嘅平台；Trip.com同Expedia要稍等先上线。
Step 2：预订合资格住宿
拣住宿时记得确认地点喺福冈市及北九州市以外，折扣会喺预约时直接反映，唔使抵日后申请任何手续。
Step 3：连住多晚照计
同一般住宿优惠唔同，呢个补助连住多晚都会逐晚计算，住得越长悭得越多！二人入住一晚已可节省6,000日圆（约320港元），足够食多餐好嘢。
福冈周游巴士同步半价优惠
配合住宿补助，福冈县同期亦推出「よかバス」（Yoka Bus）巴士团半价助成，金额为车费嘅二分之一。但要注意，呢项优惠嘅指定预约平台同住宿唔同，系经Tripadvisor及KKday预约。适合不自驾、又想玩交通较不便地区嘅旅客。
常见问题 FAQ
Q：香港人用到呢个补助吗？
A：可以。计划对象为所有访日外国人，香港旅客经海外订房网站预约合资格住宿即可。
Q：住博多或天神嘅酒店有冇折扣？
A：冇。福冈市及北九州市嘅住宿设施不在范围内，只适用于呢两个政令市以外嘅福冈县内住宿。
Q：优惠会唔会提早完结？
A：有机会。活动预算约2.3亿日圆，预计支援约7.7万人次，名额有限，订房前建议先确认活动仍然生效。
Q：用边个订房网站先有折扣？
A：官方只指定 Expedia、Agoda、Trip.com 三个平台适用。
【延伸阅读】
笋工｜河南老君山6万月薪请云海观察员 包食宿住山顶30日 每日拍一条片好轻松 即睇入职要求＋工作性质
游台注意｜超强台风巴威袭台 NASA发恐怖风眼照 巨大风暴圈足覆盖整个九州 国泰往台北高雄免费改票
暑假抵玩旅行团｜$2999起杜拜7天团 阿联酋航空直航 玩尽哈利法塔＋棕榈塔 即睇亮点＋成团日期
长荣送机票＋15万奖金｜香港居民专享 飞美加欧日韩澳洲台湾东南亚 即睇参加方法＋攻略 7.31截止