近日突傳於醫院留醫嘅資深電影人 施南生 ，7月13號晚上離世，終年75歲。
佢前夫與工作拍檔 徐克 深夜於醫院向傳媒公佈消息。徐克指施南生自2022年起，身體免疫系統出現衰退問題，不過佢一直堅強接受治療，唯最近因病毒感染，故入院接受治療，亦堅持至最後一刻，最後因多重器官衰竭離世，親友家人都伴於身旁。
徐克續指施南生同家人非常感激各界關心、支持與祝福，亦希望將難過與思念轉化成力量，溫暖地接受佢嘅告別。
從事電影業多年嘅施南生相識滿天下，佢離世消息傳出後，唔少電影明星都紛紛致哀，其中 林青霞 成龍 舒淇 周迅 李冰冰 都先後公開悼念好友。施南生最後一次公開露面係5月，當時佢出席同樣係電影人嘅好友 谷薇麗 喪禮，當時已見佢身形消瘦，亦需朋友攙扶。
早於70年代已加入影視圈嘅施南生，極受圈中人尊敬，早年佢先後於各個電視台任職幕後崗位，80年代轉戰電影界，更係新藝城「七怪」成員之一，身為唯一女將嘅佢處事仔細分明，亦係當年港產片揚威全球嘅功臣之一。
1984年佢同徐克成立電影工作室，曾製作多部經典香港電影，1996年兩人成婚，更被譽為係影壇中嘅「神鵰俠侶」，徐克更曾於早年訪問大讚太太辦事有如定海神針。兩人婚姻維持18年後離異，不過之後兩人仍保持友好關係。
