雲集政商界精英嘅「大灣區環球業務拓展高峰論壇」，行政長官李家超 、渣打銀行香港兼大中華及北亞區行政總裁 禤惠儀 、以及電視廣播有限公司行政主席 許濤 等都有出席。平時主持節目口才了得嘅 區永權 今次擔任論壇司儀，聽到業界精英嘅分享，佢都覺得獲益良多。
Albert話好開心可以擔任論壇嘅司儀，能夠置身其中，絕對係好榮幸：「大灣區喺中國經濟最重要嘅板塊之一，所有需要聯通世界，去其他地方出海做生意，都必定要經過呢個地方，所以我覺得自己獲益良多。」Albert又話作為一個主持人，如果可以學多啲唔同知識，喺有需要嘅時候攞出嚟用，其實對主持工作都有好大嘅幫助。
Albert兩個囝囝上年去咗紐西蘭讀書，近日放假返咗香港，最開心嘅一定係區太喇！Albert話太太過去一年阿仔唔喺身邊嘅空虛，好快填補晒，日日對住兩個仔噓寒問暖。而自己就關心阿仔嘅感情事，據聞有女同學主動追求細仔，但細仔竟然拒絕咗對方：「拒絕得一定係唔合眼緣，或者未到佢嘅審美標準，但係我睇相係靚㗎喎，所以我都好想知，點解阿仔要拒絕人哋呢？」
