年度大型電視籌款晚會《明愛暖萬心》於7月11號圓滿舉行，一眾歌手鼎力支持，李幸倪（Gin Lee）為善舉獻唱新歌，盧冠廷傾力演出，同場仲有車婉婉夥拍後輩胡鴻鈞、周吉佩及潘靜文合作獻唱以「傳承」為主題嘅環節，帶出追夢傳承嘅感覺，婉婉話綵排時都有啲感動。
吉吉話螢幕播出婉婉昔日得獎舊片，婉婉自嘲當年塊面好似「光酥餅」，大到阿媽都唔認得，吉吉就覺得呢個環節幾感動，加上有朋友扮演佢哋童年版，好似時空穿梭嘅劇咁！
真人騷節目《魔音女團》誕生嘅新女團 MYNT，宋宛穎、倪樂琳、莊子璇、喬美莎、倪嘉雯及盧映彤以全新造型亮相，令觀眾眼前一亮，團員好滿意莊子璇訂嘅新服飾展示現到各人優點。
張與辰聯同劉洋夥拍導師韋綺姍、谷婭溦獻唱經典歌曲，帶動觀眾捐款，為善款增添唔少進賬。姚焯菲、洗靖峰及力臻以全新形式演出校園歌舞劇，為節目帶嚟清新嘅感覺。
