許光漢出席活動粉絲用生命尖叫 預告低調裝束赴蘭桂坊消遣

台灣男神 許光漢 近期經常出現喺香港，氹得一班香港嘅許太們非常開心，呢日光漢又現身商場出席保養品代言活動，現場尖叫聲不絕於耳，男神魅力果然非一般。光漢話香港fans一次比一次更加熱情，佢仲搞笑話，feel到班fans用生命在尖叫，希望大家支持偶像之餘都要好好保護喉嚨。

近期多咗時間留港工作嘅光漢，都有把握時機品嚐香港美食，好似牛腩麵、菠蘿油，雖然大飽口福，但因為工作忙，非但冇肥到，反而仲變瘦添。光漢之前曾經講過好想去蘭桂坊消遣，佢話如果有時間，想約埋朋友或者工作人員一齊去，由於自己私底下打扮比較低調，又鍾意戴帽，所以就算去到蘭桂坊，都唔擔心會被人認出咁話。