劉德華監製《談判專家》6.13上映 劉青雲X吳鎮宇相隔19年再度碰頭

劉德華監製、邱禮濤執導及編劇，劉青雲、吳鎮宇領銜主演嘅新戲《談判專家》將於6月13日上映，噚日電影發布最新海報及預告，青雲及鎮宇相隔19年再度攜手合作同樣演談判專家，一場警署挾持人質案，引發雙雄智力交鋒，舌戰「講數」！

談判專家卓文偉（劉青雲飾）被陷害成為殺警及貪污案主腦，為查出真相自證清白，鋌而走險大鬧警局並綁架警察。

海報見青雲及鎮宇身穿防彈衣神情堅定，預示二人將展開心理及智力嘅較量，而兩位主角喺預告片中，短短「講數」片段經已非常精彩，談判背後似乎暗藏著更深謎團。劉青雲飾演嘅談判專家卓文偉意外變身為大膽綁匪，潛入警署挾持人質，佢豐富嘅談判經驗讓警方束手無策。卓文偉堅持只與另一談判專家謝家俊（吳鎮宇 飾）「講數」，局勢隨即逆轉，雙方高手過招，舌戰平分秋色，一時「有數講」，一時「冇數講」，包圍警局嘅狙擊手如箭在弦，人質生命同時危在旦夕，呢場鬥智鬥力對決最終誰勝誰負？

劉青雲、吳鎮宇領銜主演嘅新戲《談判專家》將於6月13日上映。

華仔同邱禮濤繼《拆彈專家》後，再次以監製及導演身份領軍，帶來另一部「專家」系列作品，幕前陣容更邀請到青雲同鎮宇，青雲憑《神探大戰》三度登上金像獎影帝寶座，鎮宇憑《鎗火》獲金馬影帝，青雲同鎮宇一向老友，上一套合作電影經已係2005年《喜馬拉亞星》，相隔19年終於再喺銀幕上碰頭，片中兩人關係非敵非友，將有連場極具張力嘅對手戲！電影另一焦點是青雲繼《暗戰》系列，再一次飾演談判專家，今套新戲青雲將會以另一風格「講數」，為觀眾驚喜！

卓文偉與謝家俊（吳鎮宇飾）鬥智斡旋，拆解貪污案背後的莫大陰謀！

《談判專家》改編自1998年荷里活鬥智神作《冇數講》（The Negotiator），電影同樣由兩位影帝，森姆積遜（Samuel L. Jackson）及奇雲史帕西（Kevin Spacey）主演，身兼編劇嘅邱禮濤將以全新視角及敘事手法，重新詮釋呢套經典作，青雲表示故事改編出色：「反高潮、很好看的劇本！」

《談判專家》改編自1998年荷里活鬥智神作《冇數講》（The Negotiator）。

邱導今趟將鏡頭聚焦紀律部隊另一重要職業 － 談判專家身上，佢非常雀躍接受新挑戰：「這次拍攝的是不一樣的警匪片，談判專家是華語電影裡幾乎沒有呈現過的職業。」擅長拍攝動作大片嘅邱導，今次執導文戲為主嘅故事，戲中依然保持其一貫風格，舌劍唇槍嘅談判場面，緊張程度不亞於他過往大製作！兩位影帝級人馬之外，苗僑偉、姜皓文、鄭則士、周文健、黃又南、顏卓靈、朱栢謙、朱鑑然和楊偉倫等實力派演員都有助陣演出，共同參與這場談判桌上的智慧交鋒！
海報見青雲及鎮宇身穿防彈衣神情堅定，預示二人將展開心理及智力嘅較量。