StarTalk｜林峯憑九龍城寨打出新境界 現實與古天樂亦師亦友感激對方照顧

歌影視三棲發展嘅林峯近日憑喺電影《九龍城寨之圍城》飾演陳洛軍成為城中熱話，呢日佢就接受TVB娛樂新聞台節目《StarTalk》專訪，同王鎮泉 Jeoffrey暢談拍攝感受。
 
電影集結唔同年代演員，當中最有份量級就莫過於洪金寶、古天樂、郭富城、任賢齊。而阿峯飾演嘅陳洛軍喺戲中有多場高難度動作場面，更要同前輩交手，作為後輩嘅佢覺得好興奮，亦期待喺前輩身上學習、同埋碰撞到更多火花。

雖然拍得武打場面就肯定少不了受傷，但阿峯呢次就因為一場同小齊對打嘅戲份而搞到十字韌帶撕裂，令佢煞科前往內地參加一個歌唱節目時都係負傷上陣，連排舞師都驚訝點解佢可以咁傷。
 
呢次阿峯同古仔喺戲中關係都算係易師易友，而大家見到佢哋，少不免會諗返起經典劇集《尋秦記》嘅趙盤同項少龍。阿峯就話佢同古仔喺現實生活中繼續係易師易友，佢更慶幸喺入行初時認識到古仔並得到對方提點，而家古仔更成為佢老闆，對佢嘅照顧從來冇變過。雖然阿峯就冇再重溫過《尋秦記》，不過佢就會睇返自己最新嘅作品，重新思考自己有冇好好將當時對角色理解喺畫面上發揮出嚟。