沈宗賢Fans Meeting為媽咪送驚喜 爆同關心妍合照背後可愛原因

沈宗賢Fans Meeting為媽咪送驚喜 爆同關心妍合照背後可愛原因

沈宗賢(Sean)因參加《中年好聲音2》吸納唔少fans,呢日佢第二次喺香港舉行Fans Meeting,仲邀請同樣係中二生嘅戰友安雅希、朱博文、同樣來自馬來西亞嘅歌手龔柯允做嘉賓,阿Sean自彈自唱之餘,仲同嘉賓輪流jam歌。阿Sean話因為第一次嘅Fans Meeting有好多粉絲投訴參加唔到,所以要求佢快啲搞多次。呢日見雅希瘦咗唔少,佢話自己為咗撐阿Sean場,特登由內地趕返香港。

活動當日適逢母親節,阿Sean媽咪都有陪同阿仔一齊出席Fans Meeting,阿Sean都好識做,準備咗母親節驚喜畀媽咪,又送蛋糕又送花,再加埋心心手勢,氹得媽咪好開心。原來Sean嘅媽咪自從佢參賽以來就一直long stay喺香港,仲經常煲湯畀阿仔飲,唔怪得阿Sean喺比賽中越唱越勇喇!

阿Sean日前喺社交平台po咗一張同關心妍(Jade)嘅合照,引起大家猜測佢哋嚟緊係咪有機會合作,阿Sean就話自己係透過龔柯允嘅介紹先會認識阿Jade,原來阿Jade嘅囡囡係《中聲2》嘅忠實粉絲,阿Jade仲話阿女有交代一定要同阿Sean影相!

 相關推薦

熱門搜尋