九龍城寨之圍城｜上畫15日票房破5千萬 伍允龍張文傑與學生分享拍攝

加入大量漫畫元素同時重現當年城寨風情嘅電影《九龍城寨之圍城》，上映15日口碑載道，仲喺佛誕假期一早就票房最創佳績，已突破5000萬。

有份主演嘅 伍允龍 同 張文傑，近日繼續四出到唔同場次謝票，前日仲應邀出席學生特別場，同在場嘅博愛醫院鄧佩瓊紀念中學、香港大學及浸會大學過百名中學、大學生面對面交流。張文傑同伍允龍仲邀請同學生同老師上台互動，呢位任教歷史科同公民科嘅老師，提到呢次帶學生觀賞描述香港歷史嘅《九龍城寨之圍城》，對學生嚟講有深層次學習作用。而除咗交流分享，張文傑仲即席表演後空翻，又抱住參與互動嘅男同學翻一圈，等佢親身感受後空翻動作。

張文傑於特別場協助互動嘅男學生體驗後空翻

有在場同學問到武打演員嘅內心感受時，伍允龍就話：「吞劍、跌落街係假嘅，都係電影嘅魔術，但動作上我哋都要親身去做，格鬥、打鬥、跌落地都係真嘅，至於心態就是盡力做好件事，令觀眾睇到部戲而興奮，做演員最難嘅係，拍咗幾日先睇到幾分鐘片段，拍10個take都要顯示一樣嘅精力。」

特別場招待過百名中、大學生欣賞電影，伍允龍同張文傑亦同大家分享拍攝感受

至於張文傑就被問佢嘅角色「四仔」需要蒙面，會唔會影響佢演出意欲？張文傑就話：「我都會問既然蒙面，係咪任何人去演都得？而且發覺角色所用嘅面罩似底褲，最初拍攝時更被劇組人員取笑，笑到我都尷尬。但當我投入角色後，我就要求導演先保持我真面目嘅神秘，等返城寨打先露出真面目，最終導演接受呢個意見。」佢仲透露自己從小習武，係動作演員出身，接到呢部電影演出，有一種「練功多年，就等一個機會」嘅心態。電影同步於Megabox舉行展覽，展出海報同模型

而電影嘅主題展覽「城寨縮影：畫城紀」，亦同步於九龍灣Megabox舉行，當中展出電影幕後團隊製嘅歷程，仲有由10位本地知名漫畫家同插畫家，以唔同風格繪製嘅電影海報。現場仲展出九龍城寨微影模型，等觀眾重溫電影當中嘅城寨場景。 
微縮比例模型重現當年嘅城寨風情