早D知早D醫｜黎諾懿患痛風後學懂注重飲食 黃翊太太樂觀對抗末期腎衰竭頑疾

由 洪永城 宋宛穎 何沛珈 同 魏韵芝 主持嘅健康資訊節目《早D知早D醫》星期二晚播出一集主題係痛風，邀請 黎諾懿 分享約8年前第一次發病經過。當年約36歲嘅諾懿，起初以為係腳趾公扭傷、不以為意，直到紅腫先去求醫，經連番檢查後證實患上痛風。

諾懿自認年輕時愛飲酒加打邊爐，有時通宵拍劇後又會去飲番杯，並特別鍾情飲啤酒，一晚一、兩打更係基本，諾懿笑言：「我喺公司出名唔會飲醉嗰幾位……有次信錯好友話飲黑色啤酒健康好多，飲完又再復發，就知道啤酒唔可以再飲！」

諾懿年前因為飲食影響而患有痛風症

諾懿指病發時手指關節會感到麻痺甚至有僵硬感；更爆曾親眼見過一名前輩，因嚴重痛風送醫後、喺關節位置抽出結晶物體：「當知道自己有呢個病時，都心諗『死啦！我會唔會咁呢？』。有咗(病)唔好怕去醫，唔理佢病情會愈嚟愈嚴重，到想理時可能變咗形！」諾懿透露而家十分注重飲食，並養成咗多飲水同運動嘅良好習慣。

同集仲有黃翊太太、前藝人 陳存正 分享備受腎病困擾長達十多年嘅心路歷程。陳存正約十多年前被診斷患上慢性腎衰竭，需服用抗癌藥物，同時還有類固醇藥物，並因而引發唔少副作用，包括滿月臉（Moon Face）及脫髮等，並曾持續一個月出現血尿情況，另亦因貧血導致四肢無力。

黃翊太太陳存正早年曾擔任主持人，近年就一直與腎病搏鬥

當時兒子出生冇耐，存正同時不幸患上產後抑鬱，身心俱疲：「乜都做唔到，想抱吓個仔都唔得……」經常因病穿梭醫院嘅存正，試過最嚴重休克咗13日，當中更有幾日要靠儀器幫助呼吸：「如果唔係走咗㗎喇。」之後存正由慢性腎衰竭演變成末期腎衰竭，每周要花3天時間到醫院洗血。由於治療過程漫長又痛苦，存正曾經以淚洗面，最終能撐過難關、全靠兒子陪伴同鼓勵：「病就喺度㗎喇，開心又要病，唔開心又要病，點解唔開心啲咁去病呢？」節目中，存正兒子黃睿(Wesley)亦罕有亮相，更同黃翔儼如餅印一樣。

病情曾非常嚴重嘅佢，話乖仔嘅支持同鼓勵對自己非常重要

而今晚5月15日播出嘅第12集主題係青光眼，將邀來素人青光眼患者分享患病經歷，並由多位專家講解檢查及治療方法。

《早D知早D醫》逢星期一至三晚 22:30 翡翠台