胡楓為澳門演唱會綵排 張繼聰靜待紅館開騷機會

仲有幾日 胡楓 就喺澳門開演唱會，連日嚟修哥都忙住練歌，呢日嘉賓羅蘭姐、 張繼聰 同埋 蘇永康 就同修哥一齊綵排，演繹百聽不厭嘅《朋友》。修哥以92歲高齡開騷，破咗亞洲記錄，不過佢就一啲都唔緊張，亦都無壓力，事關佢話自己做足功課嘛。

呢次修哥係親自邀請羅蘭姐做嘉賓，咁有誠意，羅蘭姐就當然二話不說答應演出啦，雖然羅蘭姐自認歌喉麻麻，就好彩有修哥鼓勵，叫佢放鬆啲唔駛緊張，只需要享受觀眾對佢嘅喝采聲呀。

修哥喺圈中出名多契仔契女，佢話唔排除到時有即興上台嘅場面發生，尤其係張家輝呢個契仔，真係認真唔話得，幾乎每次修哥開騷佢都例必撐場，修哥仲話如果唔揾佢，家輝係會主動聯絡佢自薦做嘉賓，羅蘭姐都大讚家輝好有孝心，就算工作幾忙，都一定會抽空約修哥飲茶。而阿聰加入電視圈拍嘅第一套劇集，就已經有機會同修哥合作，佢仲話一早已經發現修哥非常識得養生，好似喺片場修哥都係選擇企多過坐，非常健康，所以阿聰話要好好向修哥學習，佢仲話羨慕修哥可以喺紅館開咁多次演唱會，希望自己有朝一日都可以實現紅館夢呀。