《家族榮耀之繼承者》逢周一至五晚上八點半翡翠台播映，噚晚（16號）播出第4集高潮所在，絕對係丘智斌（羅子溢飾）被揭出係守義（羅嘉良飾）二房太太邵家碧（張鳳妮飾）嘅親生兒子， 當年守義為爭奪家族話事權，將剛出生嘅智斌與守義正室戴綺婷（余安安飾） 誕下嘅芷嵐（梁靖琪飾）調包，智斌意外得悉真相後大為震撼。
今晚播出第5集，智斌主動與家碧相認，對於相隔近30年終於聽到阿仔叫「媽咪」， 家碧眼眶馬上谷滿激動又感動嘅眼淚；二人喺佛堂拜見祖先嗰陣，家碧情緒又由強忍悲痛哽咽訴說不堪回首嘅過去，當見到阿仔如此生性，又再轉換為喜極而泣，短短一個場口，鳳妮將兩種不同層次嘅「喊戲」拿捏得十分精準。
是次張鳳妮96年年尾離開TVB後、闊別螢幕長達28年後嘅「復出」，出山原因係總監製梁家樹親自邀請，而鳳妮成功成為劇集亮點之一。鳳妮繼經典劇集《天地男兒》後、相隔28年再與撈家合作，因而引爆《天地男兒》集體回憶外；近日不少網民翻出鳳妮昔日靚相與《家族榮耀之繼承者》做對比，大讚現年57歲嘅鳳妮保養得宜、氣質特別，又大讚鳳妮喺第三集嘅晚裝扮相明艷照人。鳳妮息影前最後一部劇集作品《苗翠花》，亦成為討論焦點，網民大讚鳳妮喺該部作品演出生鬼又亮麗。
鳳妮於1987年憑藉參選香港小姐進入娛樂圈，較令人深刻嘅劇集作品有《同居三人組》、《餐餐有宋家》、《天地男兒》及《苗翠花》等，鳳妮當年被認為演技不俗，如今喺《家族榮耀之繼承者》演技再受肯定，網民更大讚佢演繹豪門少奶入型入格，鳳妮為咗演出《繼承者》確係花咗唔少功夫，雖然鳳妮飾演家碧看似人畜無害，其實暗藏「機心」，不時喺綺婷與守仁太太朱麗琪（陳靜飾）吵鬧時暗爽。
鳳妮受訪時坦言事前做足功課，鑽研「機心二房」角色前已睇咗三次劇本：「呢個角色好大挑戰，所以我先接拍。我初初睇劇本，頭兩次係當故仔咁睇，去了解（角色）頭段、中段同Ending嘅分別。之後再每個場口去mark應該點做，盡量唔想做到咁乞人憎，所以我對三個小朋友（梁靖琪、陳瀅、羅子溢）一視同仁，希望令角色睇落有啲可憐嘅感覺。呢個角色對我嚟講難度非常高，我仲未能夠做到最好，希望觀眾睇咗之後畀啲意見我。」
鳳妮起初入劇組狀態不太好，並感謝子溢帶佢入戲：「我初初入組時，好多場都唔係好入到戲，好彩都唔係重頭戲，係我阿仔子溢帶到我。最難忘嗰場係我帶佢見我已過身嘅父母（第五集），嗰場戲主要係我講對白，子溢冇乜對白，不過佢畀我嘅反應係開始眼紅、熱淚盈眶，然後捉住我隻手，呢啲畀到我好足嘅戲，我可以跟住佢嘅情緒做反應，到佢叫我阿媽，我就有眼淚流到出嚟。呢場戲好似第四、第五日左右拍嘅，拍完就好似開咗竅咁，個人安心咗，啲戲之後都做得放咗，因為我知道子溢可以帶到我戲。」 
《家族榮耀之繼承者》逢周一至五翡翠台 8 點半播映