陳嘉倩噚晚（16號）起一連兩日初登場，擔任飲食節目《美食新聞報道》主播，曬白滑香肩嘅嘉倩表現跳脫，同黃婉曼一唱一和介紹美食，非常配合。今晚（17號）伍倩彤先介紹一間日賣200件可麗餅嘅店舖，當Gillian訪問店主Bryan知道高峯期要排隊90至120分鐘先買到時，露出不可置信嘅表情，最後分別試咗焦糖吉士同抹茶紅豆白玉口味。
今集「故事味緣」介紹一間位於上環蘇杭街嘅居酒屋，由三位志同道合年輕店主打理，營運總監David講到店鋪營業時間時係由下晝12點半到我哋飲醉咗為止。可以話係無休嘅居酒屋，差唔多每晚都係街上最遲打烊嘅餐廳。侍酒師Kim卻不以為苦，反而非常享受。至於主廚Mory嘅fusion菜非常出色。三位店主希望入到嚟嘅客人，可以享受美酒佳餚，同時打成一片，成為互相傾訴對象，分享開心或不開心嘅心事。
噚晚吳兆麟同胡敏芝出擊介紹一間主打越南fusion菜嘅餐廳，佢哋先後品嚐越南咖啡骨（咖啡+豬骨軟）同招牌金邊粉配5款肉，Alan同Karen試食後讚不絕口。Karen對一款創意十足名為「惹火上身鹹檸豬頸肉」讚不絕口，焦燶邊加上少肥，令佢食唔停口。噚晚「故事味緣」主人翁Dicky開設嘅素菜館，佢製作嘅點心試過嘅客人無不回頭。Dicky嘅宏願係希望藉美味素菜，令人可以減少食肉。
《美食新聞報道》逢周四晚9:35分及周五晚9:30 TVB Plus（82台）播映