張馳豪苦練掟拍檔落台 潘靜文陷自我懷疑喊唔停

潘靜文、張馳豪同林智樂經已蓄勢待發為嚟緊嘅演唱會做好準備，由於騷上佢哋會演繹好多唔同歌手嘅作品，所以要記好多歌詞，不過Aska話最難反而唔係記歌詞，而係佢要將Sherman好似拋鉛球咁掟落觀眾席度，令觀眾可以好似做人浪咁接住。Sherman話經已盡量節食減磅，但Aska指對方已經減冇可減，只係成個動作嘅技巧上，Sherman要再放膽啲，Felix就大賣關子唔肯講詳情，等大家入場欣賞。

Sherman日前喺社交平台上載咗幾咗喊相，話自己好似中咗咀咒咁成日喊，情況好差，帖文令大家好擔心，好彩之後佢再帖文講返已經雨過天晴。講到此事，Sherman解釋起因係有啲自我質疑，覺得今年冇乜新突破，但係好彩有妹妹（林智樂）出現陪佢分享心事。Felix話因此自己就提議Aska喺台上將Sherman掟落台，等佢感受下台下嘅愛。Sherman話事後收到有好多人私訊鼓勵佢，佢就覺得點解自己咁傻會自我質疑，而成件事上，媽咪嘅陪伴係畀佢好大支持。