方媛被指臉腫鼻大疑似懷孕 郭富城指有冇寶寶順其自然

天王郭富城同太太方媛經已結婚7年，兩個囡囡分別係6歲同5歲，最近天王嫂被網民野生捕獲，被指臉腫加鼻頭變大，疑似懷孕，城城出席活動時被追問此事，佢就話點解呢件事自己都唔知，佢指將來再有冇小朋友都順其自然，但係睇到太太張相反而覺得心痛，因為太太忙於照顧好辛苦，有時唔化妝出街被影相都唔介意，呢點亦係令佢欣賞之處。城城就話應承太太如果忙完工作，就會陪太太去旅行叉下電。

日前母親節，城城一對寶貝囡都有送心意卡畀媽咪，城城都話囡囡們畫畫好有天份，因為有時佢寫完書法或者畫作會放喺屋企，囡囡們都有所感染而好鍾意畫畫，城城仲話囡囡們用色好靚，反而令佢有所啟發，甚至將囡囡們畫作放咗喺演唱會嘅歌詞簿入面。