梁芷珮Christy 主持嘅新旅遊節目《沙特阿拉伯潮什麽》，今次將會帶大家去到阿拉伯半島面積最大的國家—沙特阿拉伯。
隨住沙特王儲Mohammed bin Salman （薩勒曼）掌權後，推出唔少改革，包括女性可以駕駛、工作，及開放旅遊等等規條。但喺2019年開放旅遊管制後，卻因為疫情而絕少遊客去到沙特阿拉伯旅遊。
今次Christy喺極少旅遊資訊、完全冇支援同事前聯絡嘅拍攝情況下，勇闖呢個咁重視宗教信仰嘅國家，佢仲行到邊玩到邊，見識沙特阿拉伯國家文化遺產，Christy喺每集尾段仲會分享遊覽當地嘅小貼士！
20嘅晚播出嘅第一集，Christy喺香港出發到杜拜轉機，再飛往利雅得（Riyadh）機場。第一站先到位於西北部嘅AlUla（歐拉），既是綠洲城鎮亦是沙漠。今集三大必睇位，分別係沙漠glamping露營車、全球最大鏡面建築，同埋歷史悠久嘅巨型古墓！
Christy罕有直擊辦理住宿check in過程，喺岩石中央嘅「酒店大堂」令人相當驚喜。除咗露營車tour，仲介紹沙漠中被岩石包圍嘅世一泳池；日頭可以喺營地玩跳彈床、踏單車，夜晚可以喺露天影院睇電影，咁難忘嘅體驗難怪Christy都話：「原本我嘅第一位係冰島或肯雅，依家極速攞咗我嘅第一位！」
而沙漠中、全球最大嘅鏡面建築Maraya，零死角鏡面反射住AlUla嘅沙漠美景，Christy仲畀咗兩大絕美打卡貼士，想知道幾時、邊個位置影得最靚？記得留意節目啦。至於重要景點之一、沙特阿拉伯第一個世界文化遺產Hegra（黑格拉），除咗可以參觀公元前1000年古老民居，由天然岩石雕琢而成嘅古老墓穴，更散發住古老又神秘嘅氣息。
而21號晚播出嘅第二集，Christy四出探險遊覽歷史悠久嘅歐拉古城（AlUla Old Town），迂迴似迷宮嘅巷弄，共有9百間小屋，配合近年旅遊開發，大部分小屋已轉型為咖啡店及手信店舖，幾乎每個角落都係打卡位！著名地標之一嘅大象石（Elephant Rock）同樣十分「打卡able」，Christy趁住日落黃金時段邊歎咖啡邊欣賞日落景色，壯觀指數爆燈！此外，佢仲去到Cultural Oasis環保園參觀，大玩空中飛索極限運動，動靜皆體驗。沙特阿拉伯文化遺產固然讓人嘆為觀止，而當地人友善極致嘅態度，更加係令Christy愛上呢度嘅重大原因。
《沙特阿拉伯潮什麽》逢星期一至三 22:30 翡翠台
