StarTalk一氣呵成版｜ 譚輝智備戰處男騷 公開童年照水中英姿

《中年好聲音2》嘅人氣王兼亞軍 譚輝智 即將舉行首個個人演唱會，出道兩個月多啲咁快就有個人騷，輝智起初都唔敢相信，但係最近佢都要將壓力變成動力備戰，呢日輝智作客《StarTalk》，同主播 許文軒 分享準備情況。

雖然輝智自暴其短直言有四大擔心，包括唔記得歌詞、唔識搞氣氛、跳舞唔好睇、同埋唱歌唔夠氣，但因為呢個佢人生首個售票演唱會，為咗對得住歌迷，輝智都諗辦法逐一擊破難關，選歌方面佢亦誠意滿滿：「唔想再唱比賽歌，基本上全部都新，只係得一首半首係大家聽過。唔記得歌詞都可以有提詞機幫手，最擔心係體能方面唔可以應付咁長嘅騷，而家都開始跑步同游水練氣。」

眾所周知，輝智咁鍾意唱歌係受爸爸嘅薰陶，參賽以來爸爸都會現身電視城坐咗足幾個鐘支持，但為咗唔俾壓力乖仔，譚爸爸對輝智嘅唱功都刻意唔俾意見，兩父子反而靠輝智嘅太太做中間人溝通， 輝智亦公開唔少佢童年同爸爸嘅合照。 

至於講到參加中聲以來最大嘅改變，輝智直認係自信方面，佢當初唔相信自己得到咁多粉絲愛戴，特別收獲狄波拉呢位星級頭號粉絲，輝智坦言同拉姑事前唔認識，亦唔知拉姑為何迷上自己，搞到佢都忍唔住當面問拉姑。