星光路上足本版｜ 梁思浩剖白年幼經歷 影響深遠曝隨時準備引退

同靈異節目幾乎已掛上等號嘅 梁思浩 近日喺TVB主持直播節目《直播靈接觸》，但係除咗神神怪怪，思浩多年來嘅發展一啲都唔簡單，就連家庭生活亦並不如意，佢喺《星光路上》就同 潘盈慧 一一將自小成長嘅故事道來。

父母離異要決定選邊站，年紀輕輕就要決定追隨生母移居外地或繼續留港，亦意外因而被星探發掘，亦因家庭背景歷練，令佢獲得首個拍攝廣告嘅機會。接連拍完近廿個廣告之後，又再次被高層提拔，加入TVB拍攝經典處境劇《城市故事》，「洗米華」嘅百駁嘴厭搞搞震性格，亦令佢瞬間入屋，同步拍劇又加入電影圈。

思浩雖然生活唔算順遂，不過就可以形容為貴人不絕，年幼時嘅一位婆婆，就令佢感激至今。同家人疏離之下，圈中嘅長輩就被佢視為家人，其中一位係「肥姐」沈殿霞，一味「眼淚豬肉」，仲令佢永遠難忘。

近年一提靈異，就同思浩不脫關係，原因當年一位電視台高層相中佢嘅講故事技巧，多年下來仲於星馬當地都開設節目，更被冠以亞洲鬼王稱號。出生基層嘅佢，近年仲佈施協助無依者嘅身後事，不論係長者定白頭人，思浩收到要求都必定協助。

新節目結合線上同線下同步互動，可以話係電視史上首次，思浩就直指體驗非常有趣。多年來電視、電影、電台俱有接觸嘅佢，就連引退作都已經有構思，打算於舞台上向所有觀眾朋友道別，仲連劇本都早已準備妥當，劇終之時就係自己引退一刻。