由國際知名導演 王家衛 執導同擔任監製嘅首部電視劇《繁花》，將由6月3號起於翡翠台播出。製作單位澤東同TVB經過詳細討論之後，翡翠台成為內地以外，全球中首個播出呢部話題劇嘅電視平台，
《繁花》故事發生在90年代嘅上海，導演兼監製 王家衛 多年來嘅作品亦滿載香港人拼搏精神；過往多次奪得香港電影金像獎殊榮、又憑《春光乍洩》成為香港首位康城最佳導演得主嘅佢，其實早於1980年就透過TVB第一期編導人員訓練班投身幕後行列。
王家衛早年曾任劇集《輪流傳》助理編導，又不具名參與《執到寶》、《神女有心》等劇集製作，今次王家衛傾力攝製嘅首部電視劇，由TVB成為除內地以外，全球地區電視平台首播嘅第一站，可以話係別具意義。
《繁花》劇本以上海話撰寫， 劇中演員亦全程主要以上海話進行拍攝，為令觀眾更易代入劇中90年代上海氛圍，同時將劇集最原汁原味呈獻，TVB將以普通話主聲道同上海話次聲道播出。
90年代上海經濟剛剛起飛，滿街都係黃金機會、仲有大批誓要力爭上游嘅實力野心家，劇中簡單一句對白：「人生講的就是一個機會，你要是抓牢了，青雲直上。」，已反映出當代上海人嘅心態同夢想。
同一時期，香港經濟發展亦如日方中，肯搏肯捱精神造就經濟起飛；90年代嘅香港樂壇更係華語音樂嘅主要中堅力量，香港城市文化亦隨之擴散至內地，影響一大批努力奮鬥嘅年輕人。為帶出90年代上海起飛同時，亦係香港發展蓬勃嘅黃金時代，劇組重新打造出90年代嘅繁華上海盛世，觀眾們亦可以發現舊港片嘅影子同味道。
王家衛曾喺劇集花絮中提到：「也許觀眾在看我們劇的時候，會認為某些場面太過繁華了。那是因為我們要還原的是當時人、當時的感受。我第一次走進我們的黃河路的時候，我體會到甚麼叫『雙城記』，在我以前的電影裏，我在香港看到了上海；在這劇裏，我在上海看到了香港。」
《繁花》台前幕後同時亦有唔少香港團隊貢獻，呢批資深影視界精英，包括香港電影金像獎得獎常客、曾憑《臥虎藏龍》獲得奧斯卡最佳攝影嘅著名攝影師 鮑德熹 擔任攝影指導；負責原創音樂、曾多次與王家衛合作、被行內人譽可為將電影音樂「妙手回春」聖手的陳勳奇；仲有憑《倩女幽魂》榮獲第24屆金馬獎最佳服裝設計獎嘅陳顧方擔任造型指導。另外仲有劇集監製、製片、製作、美術同搭景等唔少幕後重要崗位，都係出身自香港嘅影視界精英。
被譽為「2024年必追陸劇」嘅《繁花》，自播出後於內地同港澳地區都引發熱 話，除咗掀起一陣「繁花熱」，累計有效播放更高達15億，微博累積熱搜話題逾2000多個，話題閱讀量約115億，抖音話題播放量191億。而呢部話題劇嘅豆瓣評分亦持續高開達8.7分，評價人數已超越46萬。
《繁花》播出短短半年，亦狂掃唔少頒獎典禮，風頭焦點都一時無兩。拍攝耗時超過3年先完成嘅《繁花》，主演陣容包括內地大批實力派演員，好似胡歌(阿寶)、馬伊琍(玲子)、唐嫣(汪小姐)、辛芷蕾(李李)、游本昌(爺叔)、董勇(范總)、鄭愷(魏總)等， 加上超認真製作、高度還原上海90年代黃河路一帶嘅繁華一面。劇組以一 比一比例搭建實景，再輔以電腦特效將實景加以延伸，將輝煌無比嘅90年代上海忠於現實呈現到觀眾眼前。
《繁花》6月3號起 星期一至五晚 21:30 翡翠台