上星期生日嘅 施匡翹 ，今年為慶祝，喺生日月推出第二首女女合唱歌，推出同 陳詠桐 合作嘅新歌《Girls Talk》，表達女生之間真摯嘅情感交流，打開女性面對失落愛情時嘅內心世界。
Zaina指JC一直係自己非常欣賞嘅歌手，尤其欣賞對方嘅音樂風格，佢話：「我同JC喺一個音樂會認識，完騷之後交換IG，之後一拍即合。拍MV前仲食咗幾餐飯建立友誼基礎，先可以表達到歌詞內容。食飯期間盡量了解大家，我哋鍾意啲嘢好類似，成日會討論化粧同扮靚。」
JC則話今次對合唱感覺好新鮮：「近年好少女女合唱，所以一口答應。最難忘係拍MV，我同Zaina有好特別嘅戲份，大家睇MV就會知，希望大家多多支持我哋啦！」今次Zaina同JC喺MV中化身好姊妹，一齊喺床上化粧、自拍同玩枕頭大戰，展現深厚嘅閨密情誼。
MV仲邀請咗Zaina嘅師弟華浩然(Wolris) 擔任男主角，而浩然就話同兩位前輩合作非常緊張：「始終我拍攝經驗唔多，面對鏡頭都會緊張，不過同師姐溝通之後就好啲。」佢又話最難忘要餵師姐食嘢一幕，又指自己未試過向朋友表白，所以一切要靠幻想去演。而Zaina就大讚浩然自然流露。
