鄧小巧喺「520」特別日子推出虐心情歌《討好式戀愛》，歌曲小巧好友由江海迦（AGA）作曲。去年年中，小巧跟AGA茶敍兼邀歌，AGA便開始做功課，聽多咗小巧以前嘅歌、聽小巧聲線嘅運用，就開始寫咗Melody。
小巧透露歌曲早於半年前已寫好，當中發生小插曲：「佢寫好咗大半，個電腦死咗跟住又有演唱會，一路未整好部電腦，一路收唔到佢首歌，直到大概今年一月收到佢嘅demo，佢send咗一半畀我聽。」小巧一聽已好鍾意呢個版本，隨後同公司商量要呢首歌。
歌詞方面就由小巧操刀，佢同AGA表示想寫一首關於「有多相愛便會有多傷害」嘅歌，「兩者係一個共同嘅存在」，小巧指自己有一種小小病態嘅優雅，無論點都要保持一種微笑，所以佢寫咗呢首叫《討好式戀愛》。
小巧坦言歌名來自網絡搜尋，歌詞靈感則來自朋友或自身有過嘅經歷，強調呢首歌完全冇「忠告」嘅意味，並冇叫人離開或者唔離開，有時候戀愛係一個歷程，經歷過一啲苦戀先至可以得到一啲嘅正果；歌曲監製就搵咗舒老闆舒文，亦是二人首次合作。
小巧一開始找舒文監製時，小巧十分忐忑，坦言呢個決定做得太好：「因為舒老闆係對聲音、對咬字好理解好清晰，佢對成首歌邊一啲字、點樣去用力、點樣去用感情，畀好多好實在嘅指導。雖然嗰個過程要做好多好多次，但我覺得係一個好滿足嘅過程，亦係不斷學習、不斷吸收。」小巧又指今次整個MV一個有故事發展嘅劇情，佢事前做咗好多前期功夫，特意搵好友蝦頭上戲劇課，學習肢體點樣去入戲，MV當中加入咗唔少小巧嘅生活日常，譬如習慣煮嘢畀老公食、做陶瓷、打掃衛生等。