陳楨怡為柬埔寨獻三個第一次 處女登台由腳震震變享受

陳楨怡 (Celina) 日前為柬埔寨金邊一間酒店周年活動登台，同場仲有 曹永廉 李施嬅 趙永洪。Celina以純白貼身短裙現身，大方展示白滑美背同長腿，將首次到外國工作、首次任司儀、同首次獻唱 呢三個第一次奉獻俾柬埔寨。

陳楨怡日前到柬埔寨登台，仲係佢首次到外國演出、擔任司儀同獻唱
 
首次擔任司儀兼唱歌嘅Celina，雖然喺綵排時比較緊張，但好在有曹永廉同趙永洪指導同鼓勵，阿廉仲將新買嘅耳機借俾Celina，令佢可以清楚聽到後台導演臨場指示，令演出順利完成！完Show後，Celina亦興奮表示：「今次真係好開心，係一個好好嘅經驗，第一次做司儀第一次唱歌，好多謝台下每位觀眾，氣氛好好。希望之後繼續多啲有機會出Trip演出。」

當地天氣炎熱，不過佢仍把握機會遊覽唔同景點
 
完成工作第二日，酒店貼心安排Celina同團隊遊覽景點，雖然氣溫有成40度，不過炎熱天氣仍無阻Celina落車打卡：「第一次嚟柬埔寨，一開始係有啲擔心，但係知道有好多藝人歌手都嚟過，開始逐漸放心，加上酒店出入口都設有安檢，所以非常之安全，加上裡面都有好多地方行，又有個靚泳池，仲有好多好好食嘅餐廳。佢哋既建築物好靚，好想下次再嚟。」