陳健安突襲銅鑼灣與歌迷單獨傾心事 拖手仔閒聊驚現女歌迷丈夫即縮手

陳健安 早前推出新歌《戀愛腦之死》，早前安仔喺社交平台事先張揚會現身銅鑼灣，一眾歌迷收到消息即趕往現場同佢見面。
 
新歌MV中安仔化身獨角戀愛腦妖怪，一眾「族人」對佢嘅造型非常喜愛，呢日安仔現身前仲再拜託特技化妝師還原呢個獨特形象，現身銅鑼灣行人專用區同歌迷近距離見面。「今日係想同喜歡我嘅人傾吓偈，平日好少機會可以一對一傾偈，通常都係出活動見到。今日落嚟銅鑼灣，就可以多少少時間，今朝再搵特技化妝師整MV嘅妖怪角造型，等大家可以留念。」 
 
當日近百歌迷聞風而至，每人有一分半鐘時間，同安仔喺馬路中心單獨傾心事，天南地北無所不談。當日除咗大班「族人」之外，好多路過市民亦停下腳步圍觀。 

路過嘅Beanies兩位成員Winky同釗彤都有同安仔傾偈
 
當日有人請教安仔減肥問題、有人就出謎語、問佢對咖啡嘅喜好、分享旅遊趣事、鍾意打咩Game、足球偶像等，仲有人致電身在海外嘅朋友，利用視像通話令對方可以同安仔即場對談。

而《戀愛腦之死》嘅作曲、編曲同監製 賴映彤 ，亦剛好路過，更索性停下腳步同安仔閒話家常，而新晉女子組合Beanies兩位成員 Winky 同釗彤 經過現場，仲同安仔弟享對運動同飲食嘅喜好。 

新歌監製賴映彤亦路過現場
 
又有部分女歌迷要求同安仔拖手對話，有兩母子「族人」到場，安仔拖住媽咪嘅手閒聊時，知道對方丈夫都在場嚇到即刻縮手，原來爸爸正為母子拍片影相留念，雖然知道一家三口都係歌迷，不過安仔仍猶有餘悸，非常搞笑。
有歌迷一家幾口到場，安仔拖手時媽媽驚爆老公同場，嚇到安仔即時縮手