黃劍文搞粉絲聚會邀中聲好友聯歡 李佳負傷到場交代康復進度

喺新加坡度過咗一個愉快假期嘅黃劍文（Kimman），返港後舉行粉絲聚會，而且佢仲邀請到中一生、中二生李佳、支嚳儀、沈宗賢、林若盈以及張佳添老師一齊Jam歌，令粉絲們大飽耳福。
 
聚會當日其實係林若盈正日生日，識做嘅Kimman特地為好友送上生日蛋糕兼同全場一齊大合唱生日歌，而呢個驚喜都令壽星女感動得嚟仲嚇咗一跳，簡直喜出望外。
 
而佳佳都好有Kimman心！雖然佳佳做完手腕手術仲未好返，不過呢日都如約現身。佳佳亦向大家透露目前手部情況：「因為已經係第六日，所以仲有少少腫，同埋手部唔可以活動太好，最好都係包住穩陣。」但佳佳亦笑言，自己有時都會唔記得手部傷勢，動作太大都會感到好痛。