家族榮耀之繼承者丨許紹雄暖男舉動搶鏡 愛的宣言令陳靜冧到痺

《家族榮耀之繼承者》噚晚（21號）嘅劇情重點雖然落喺皓兒( 佘詩曼 飾)同高浚( 林峯 飾)復合過程，但許紹雄嘅暖男舉動亦相當搶焦。朱麗琪Niki( 陳靜 飾)意外撞跌二人喺吉隆坡製作嘅「愛情紀念碟」，Niki雖然覺得「爛咗就算」，但守仁（許紹雄 飾)就大為心痛話：「咩算呀，呢個好有意義架，唉吔，都唔知黐唔黐得番添喎…唔好揼呀，千祈唔好揼呀！」令Niki大為感動，劇情仲交代Niki同守仁相識經過，兼且出身貧苦嘅Niki一度被引誘「搵快錢」。

守仁心痛愛情紀念碟損毀呢對情人嘅發展今晚將會詳細交代

嚟緊禮拜四(23號)播出嘅第9集，守仁「暖男」行動將進一步升級，為慶祝相識兩周年，佢悉心安排別墅池畔燭光晚餐、名貴首飾同「心心」煙花氹Niki開心，仲終極晒冷以冧到痺嘅「愛的宣言」，守仁情深地話：「我應承你，只要我一日都同你喺埋一齊，我會令到你生活過得幸福快樂，半滴眼淚我都唔會畀你流。」

一齊去唔同地方玩樂享受珍貴時光

除咗係100分暖男好老公，守仁亦係超級暖爸，當得悉女兒皓兒失眠情況嚴重，守仁即為女兒親自烹煮「安眠紅酒」，並主動關心皓兒工作情況；閒話家常時，經常不經意流露開心又有愛嘅眼神，充滿濃濃父女情。

皓兒同高浚亦已經正式復合

《家族榮耀之繼承者》星期一至五晚 20:30 翡翠台