沙特阿拉伯潮什麽｜沙漠Glamping體驗人類渺小 Christy破解遊阿拉伯國家禁忌

梁芷珮 主持嘅《沙特阿拉伯潮什麽》帶大家到既神秘又陌生嘅沙特阿拉伯，體驗各種意想不到嘅沙漠旅程。

今晚(22號)播出嘅一集，Christy會同大家一齊參觀沙漠中嘅術展，展品來自世界各地藝術家嘅手筆，佢哋將自己國家嘅文化融入作品之中，透過展品帶出正面訊息，無論視覺、嗅覺、聽 覺等感官都可以由參觀者親身體驗。期間Christy又由導遊牽手閉眼體驗感官藝術。

Christy閉眼跟隨導遊，感受沙漠中嘅感官藝術

今晚Christy亦會轉移陣地，到另一Glamping營地留宿，營地除被多座超高岩石包圍，每個私人露營包廂更加設備齊全，有齊軟床、棉被同暖爐等，唯獨私人洗手間欠奉，住客需到公眾浴室沖涼同梳洗。

喺咁宏偉嘅景色下過夜，真係有地為床天為被嘅感覺

面對咁宏偉嘅景觀，周遊過世界唔同美景嘅Christy都大為感嘆：「呢個世界好大，你要記住人類好渺小，千祈唔好睇得自己太大。」難得喺超空曠沙漠中度過一夜，Christy亦把握機會好好觀星，仲為觀眾拍低難得一見嘅「流星雨」。

身為飛索常客嘅Christy，亦會再體驗Zip Line運動，攀上45米高嘅岩石後再以飛索落山，緊張又刺激。其實沙特阿拉伯亦相當適合親子旅遊，Christy就帶大家到沙漠附近嘅綠洲植物公園，園內除咗有唔同工作坊好似繪畫班、編織班等俾大、小朋友參加，四周亦擺滿色彩繽紛嘅民族風地氈，等一家大細可邊親親大自然邊野餐。

除咗沙漠區之外，Christy亦有探訪當地唔同地方

佢亦去參觀咗市區嘉年華，同以唔同國家為主題嘅樂園，暢玩之餘又可加深了解唔同國家嘅文化， 難怪成為唔少遊客嘅必到景點喇。

佢仲會為大家解答唔少到阿拉伯國家旅遊嘅迷思

沙特阿拉伯向來予人感覺神秘，曾有傳聞指喺當地公眾場所嚴禁有任何親密行為，仲有機會隨時觸犯禁忌！咁到底前往當地旅遊嘅情侶同夫妻，又係咪唔可以當街拖手、擁抱同親吻呢？今集Christy就會將親自拆解以上迷思，等大家更了解到訪沙特阿拉伯嘅禁忌喇。

《沙特阿拉伯潮什麽》星期一至三晚 22:30 翡翠台