獨家丨周吉佩演外賣仔求愛 造型參考偶像周星馳

第一屆《中年好聲音》冠軍周吉佩，喺520呢日推出第二首個人單曲《Falling For You》，吉吉今次除咗挑戰R&B曲風外，仲專程搵排舞師度身訂造舞蹈。

拍攝MV當日團隊去到一間復古嘅茶樓取景，而舞步除咗就返吉吉嘅有限舞功外，原來其中一個step係設計嚟同fans互動，只要fans同時做出C字手勢，就可以隔空同吉吉合成一個心型，相當有心思呀。

排咗3日舞就要即刻拍MV，吉吉拍攝嘅時候難免會跳錯step，佢笑言自己已經盡晒力呀。今次個MV講做待應嘅吉吉，力追女主角阿冰，佢話自己個外賣仔造型係參考偶像周星馳，而MV入面為咗追到阿冰，吉吉又派心心又單膝跪地送禮物，唔知吉吉老婆睇到個MV後會唔會呷醋呢？