獨家｜李佳芯開腔否認有新戀情 疑患乙型流感急瘦10磅

李佳芯 2020年同陳炳銓分手後一直保持單身，但最近就傳出佢封盤，因為佢同疑似係新歡嘅男子撐枱腳時被野生捕獲，今日Ali返到電視城為新劇《麻雀樂團》開工時，就開腔親自回應緋聞！

Ali指當日只係普通朋友食飯，並無好消息，講到佢同呢位男士已經唔係第一次被捕獲，Ali就大感無奈，指自己一直會同唔同嘅朋友飯敍，但大家見到佢同男士食飯就會好奇心倍增，Ali話之前都被影過多次，甚至將有啲唔係佢嘅都寫成係佢嘅，Ali指多謝大家關心佢嘅感情狀況，當問到係咪有新戀情時會再公佈？Ali即斬釘截鐵表示自己冇好消息公佈。

對於感情事Ali就低調低調再低調，但喺啱啱過去嘅520，Ali就有開心事公佈，就係收到fans嘅愛心便當應援，Ali又透露早前自己不幸病倒，成個人變得勁憔悴，仲瘦咗成10磅，搞到佢以為自己患上乙型流感，不過好彩而家已經好返喇！