岑麗香隱藏技能被激活 重拾服裝設計師嘅快樂

唔講大家都唔知，原來岑麗香一直有個隱藏技能，原來佢係一位服裝設計師！香香23號喺社交平台post咗一條自己改造舊衣嘅片，佢喺帖文中表示自己喺high school時期，已經包辦製作自己所有衣服，無論係舞會禮服定係萬聖節服裝，香香都會自己親自縫製，佢仲話自己甚至曾經做過墨西哥摔角嘅面具呀！
香香將自己改造舊衫嘅過程拍低。
今次香香就挑戰將一件舊襯衫改造成無袖修腰襯衫，佢喺製作過程中表示，自己已經有10年冇落手縫紉過衣服，要再重新pick up返呢個技能唔係易事，香香縫製時仲不斷祈求自己唔好失敗，相當可愛。
香香重拾縫紉嘅快樂。
當改造好呢件無袖修腰襯衫後，香香當然親身上陣做model試畀大家睇下佢嘅製成品啦，佢仲喺帖文入面問一眾網民，覺得呢件升級改造嘅襯衫到底係有領好睇啲，定係冇領好睇啲。

其實今次香香拍呢條改造舊衫嘅片，係因為佢搵返好多年冇見嘅衣車出嚟，香香坦言縫紉可以令自己快樂，亦係佢與朋友連結嘅一種方式，同時都係佢將時尚夢想變成現實嘅工具，而家佢又可以回到自己熱愛嘅生活喇。