神耆小子｜羅毓儀險被姦獲冼靖峰英雄救美 鄭則士效法「殭屍理論」變熱血

冼靖峰（Archie）同羅毓儀（Yuki）喺劇集《神耆小子》中感情大躍進，22日播出嘅一集，劇情講到多多（Yuki飾）食咗魚子醬導致敏感，佢原本想邀請一鳴（Archie飾）上屋企陪佢，不過遭對方拒絕，多多只好另覓阿邦（鄒兆霆飾）陪伴，期間阿邦欲對多多霸王硬上弓，住喺隔籬嘅一鳴聽到多多呼救即時破門營救，上演咗幕英雄救美。
阿邦欲對多多霸王硬上弓。
而一鳴聽到多多食物敏感背後嘅可憐故事後，即出動「暖男三式」冧爆多多！第一式，一鳴先承諾多多會照顧佢：「以後你發現自己食物敏感時就即刻搵我，我知道敏感個樣係點，唔會畀你嚇親，我知道你啲藥放喺邊，可以即刻搵畀你，我住你屋企隔籬，可以即刻撲過嚟救你。」第二式，一鳴為多多設計咗「專屬求救Sticker」。第三式，一鳴化身「人肉攬枕」陪多多睇電視。Archie同Yuki組成嘅「一多CP」深受網友喜愛，兩人一高一矮又同為唱得之人，非常匹配，有網友留言：「呢對最萌身高差又幾襯」、「靚仔靚女，唱歌又OK喎。」
Archie英雄救美。
鄭則士（Kent哥）早前接受無綫娛樂新聞台主播潘盈慧主持嘅節目《星光路上》專訪， 講到相隔5年再拍劇，Kent哥透露全因曾勵珍：「珍姐話你好耐冇拍嘢喇喎，我話係呀，佢話有劇本搵你，我即刻搖頭擺尾話好應承佢。」Kent哥指畢竟5年無拍劇，最初曾擔心自己跟唔上節奏，最後諗到以「殭屍理論」解決：「我一望完演員名單就覺得啱喇，有血可吸，最後生嗰個係24歲冼靖峰，先吸佢啲熱血，滾到澎澎聲嘅，跟住再睇有樊亦敏、曹永廉、蕭正楠，全部後生過我，圍繞住一班咁有熱血嘅演員工作，我就吸晒佢哋啲熱血，翻新晒自己啲殭屍血，我覺得呢次係成功嘅。」
鄭則士接受無綫娛樂新聞台嘅節目《星光路上》專訪。
Kent哥點名大讚拍檔冼靖峰：「佢好乖，又好學、謙卑同埋有天份，天份對佢做演員好有幫助，好明顯睇到個劇出嚟之後，唔止係對我，佢同阿蕭嘅互動，就算喺屋企三個人嘅戲，佢一啲都唔喺下風，而係成為三個人嘅一份子。呢個係需要有天份，因為佢咁熱血，我咪生猛囉！」講到近年生活，Kent哥自言係「休而不息」：「疫情嗰3年，我早早起身飲杯咖啡，等我老婆起身同佢去買餸，買完餸之後夜晚等煮飯，因為冇地方好去同埋又唔想染病，生活變得好簡單，唯一進步咗嘅可能係我嘅廚藝。」

《神耆小子》逢星期一至五 21:30 翡翠台
Kent哥點名大讚拍檔冼靖峰。