香港婚後事｜黃金盛女姚子羚盼遇真愛 陳自瑤重提頒獎禮黑面事件

陳自瑤（Yoyo）、賴慰玲（Winki）、黎諾懿及羅天宇主持嘅節目《香港婚後事》大膽探討不同嘅感情同婚姻問題，喺23日播出嘅第9集，邀請嘉賓姚子羚（Elaine）分享。
今集嘉賓有姚子羚。
單身多年嘅Elaine坦言對愛情仍然有憧憬，但不會強求，佢話：「唔係要搵一個人結婚，而係要遇到一個適合你嘅人，我依家唔係去求職，對我嚟講婚姻係一生一世嘅事。」Winki問佢曾否遇過想結婚嘅對象，Elaine坦言有：「但依家回頭望番，嗰個人並唔係可以同我行落去嘅人，可能我最終會離婚，當你唔開心、迷惘嘅時候，往往呢啲人走出嚟嘅時候，通常都係錯嘅，因為你喺最迷失嘅時候，只要有個人行埋嚟，你就會覺得佢好好，經歷咗呢啲事你就realize，啱就係啱，唔啱就係唔啱。」
2男3女圍埋傾感情事。
之後講到姊弟戀同異地戀等話題，Elaine自爆讀書時曾有段異地戀：「嗰時喺澳洲讀書，男朋友係馬來西亞人，讀完書之後我返咗嚟香港，佢就返咗馬來西亞，最終分開咗，雖然我嗰時係讀communication(人際溝通)，但我本身唔係好識communicate(傳達)。」諾懿問Elaine會唔會接受同廿幾歲嘅小鮮肉拍拖？Elaine笑言：「廿幾歲，正吖！」之後就話：「我諗我未必得，雖然我Keep得幾好，我望落去都似廿幾歲之嘛，如果（相差）5 年之內就 OK。」節目中Elaine更會揭解拒絕姊弟戀的原因！
子羚表示拒絕姊弟戀。
四位主持亦透過打麻雀吐心底話，食糊者可以向其中一位問一個問題，率先食糊嘅諾懿戰戰兢兢問Yoyo：「你可以唔答㗎……我想問啲人成日提住你喺頒獎典禮黑面，你會唔會唔開心？同埋係咪真係黑臉？」想知Yoyo如何回應？就要密切留意節目。

《香港婚後事》逢星期四、五 22:30 翡翠台
四位主持麻雀枱上傾心事。陳自瑤親解黑面之迷。