神耆小子｜羅毓儀演繹被姦戲份感尷尬 冼靖峰為騷肌鏡頭狂操Fit

羅毓儀Yuki 同 冼靖峰Archie 喺劇集《神耆小子》中飾演一對高矮CP，生鬼演繹令觀眾受落。不過呢集Yuki飾演嘅金多多就因為食物敏感遇險，演繹一場險被 鄒兆霆 強姦嘅戲份非常逼真，拍攝時雙方都好肉緊搏鬥，好彩最終飾演一鳴嘅Archie出招英雄救美，先令Yuki成功脫險。

Yuki透露拍攝呢場戲時有少許尷尬，幸好同對手鄒兆霆事有充足溝通，更大讚對方有風度，每做一個動作都會經佢同意，令大家可以放心去演戲。原來Yuki之前都拍過好幾次類似場面，包括劇集《黯夜守護者》中一場被強姦車震戲、《雙生陌生人》同黃庭鋒床戲，至今次演被霸王硬上弓。

Archie同Yuki呢對CP喺劇中雖然醞釀愛意，但一直都未有明確進展，Archie趁機劇透，並指由劇集開始至十幾集，劇情交代好多男仔都鍾意金多多，但佢自己就因為覺得兩人價值觀不同而有距離，但最後會漸漸愛上對方。Archie又話劇中佢會有一場騷肌畫面，所以之前勤力狂操，希望帶畀觀眾驚喜。