福祿壽訓練學院｜阮兆祥獲學員賀57歲生日 培育接班人成今年最大願望

5月23號係阮兆祥嘅57歲生日，祥師兄有份主持節目《福祿壽訓練學院》TEAM FUK嘅學員精心為策劃生日驚喜送俾PROFESSOR FUK，先係一半學員引開祥師兄嘅注意，黃建東、周百恩同趙頌宜就寫心意卡同負責送蛋糕，齊齊唱生日歌。

雖然慶祝生日係件開心事，不過呢次嘅行動就有少少失誤，個個環節都出現啲小蝦碌，包括冇帶火機點蠟燭，連送畀祥師兄嘅招財貓公仔都出現小故障，搞到祥師兄笑指：「係咪十蚊店買架﹗」而學員趙頌宜就發揮美術天份，送上墨寶之外，仲作咗首對聯俾祥師兄，有個好意頭。另一位多才多藝嘅學員林樂熙就扮周星馳嘅聲線獻上經典對白送祝福：「祥師兄，得閒飲啖茶食個包，生日快樂。」

祥師兄流露驚喜表情，完全冇諗過會收到學員們嘅窩心祝賀，因為佢全副精神都放喺節目錄影扮嘢環節上，今年生日願望係做好《福祿壽訓練學院》，又話：「今次個節目有好大目標，希望發掘到新一代接捧，所以做Professor都有壓力，驚我哋有咩不足令學員未能達到最完美狀態，所以生日都諗要慶祝。」

此外，今年係祥師兄入行40周年，除咗要完成傳承任務之外，祥師兄亦有開騷大計，不過一切要等節目完結，適當時才會公布。