鄭秀文拍MV拍到毛管戙 與泰國班底聯手呈現震撼力

天后鄭秀文（Sammi）日前遠赴泰國為新歌《心魔》拍攝MV，呢次Sammi採用全泰國班底打造MV，破格之餘亦非常震撼人心，令Sammi都話好正啊！而呢次MV喺當地一個廢置劇場以及郊外校園取景，加上有泰國攝影團隊、舞蹈員、排舞師聯手，令MV意境同氣氛都格外有種破碎美感。
 
Sammi喺MV造型獨特，身上嘅紋身貼紙更足足要用45分鐘進行剪貼，所以Sammi都覺得好難揀出一個最鍾意嘅造型，事關呢一切都深得佢喜愛。而拍攝當日當地氣溫高達36度，要同40位舞蹈員又唱又跳，真係一個大考驗！但再辛苦都好，當Sammi見到成品一刻，都認為所有辛苦都係非常值得。Sammi又話：「同40位舞蹈員一齊去做動作時，即使係簡單動作，都會有好大震撼力，亦會有啲毛管戙，一切都來自真摯嘅情緒。」