李佳芯開腔回應封盤消息 病足兩星期暴瘦十磅顯憔悴

女神李佳芯自從2020年宣布同陳炳銓分手後，一直未有公開承認戀情，近日突然傳出女神封盤消息，有報導指日前Ali喺鴨脷洲一間餐廳同疑似男友開餐時被捕獲，兩人舉動甜蜜，好似情侶一樣，消息傳出後立刻瘋傳Ali正式脫單，同新歡蜜運之中。

呢日Ali返電視城拍攝新劇《麻雀樂團》時否認有新戀情：「真係只係同朋友食飯，冇好消息公布。」不過呢位被譽為大隻型男嘅男子，之前亦曾經被拍到同Ali食飯兼同遊日本，當時Ali同樣否認係新歡，對於今次再被撞破，Ali笑笑口話：「好得意，啲人好關心我感情事，我一向都有同唔同朋友食飯，大家一見到同男性食飯就會好好奇，之前都影過好多次，有啲唔係我嘅都話係我嘅，所以唔想講太多，總之冇好消息公布。」

對於感情事Ali明顯想低調，相反喺過去嘅520佢就有喜訊分享，收到粉絲嘅愛心外賣令佢好窩心同驚喜，仲話每次都被粉絲們殺個措手不及，大讚佢哋好細心，準備咗便當、熱湯、同甜品畀佢同劇組暖胃。不過Ali亦因為fans嘅熱情令佢唔敢隨便打卡曝露行蹤，因為粉絲們一知道佢開工位置就去等佢，擔心佢哋嘅安危。

忙於拍劇嘅Ali雖然睇落氣色唔錯，但原來佢之前足足病咗兩星期，一度懷疑自己患上乙型流感，而且更因病暴瘦十磅，唔怪得佢早前睇落有啲憔悴啦，不過好在而家已經好返晒喇！