電影泉攻略｜尊尼特普回歸《加納比海盜》風波持續 Anya免真剃頭多得導演丨EP104

王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。
 
由Johnny Depp主演嘅《加納比海盜》系列電影名聲赫赫，而喺2017年上映最後一集後，再加上Johnny同前妻嘅世紀官司擾攘多時，電影公司由最初揚言唔會再搵Johnny續演電影，再到全民求和，再去到電影監製Jerry Bruckheimer話唔會搵Johnny回歸，呢件事繞來弄去都已經一段時間。不過唔知係監製受唔住網民猛烈抨擊，定係內幕風向真係轉咗，最近監製就改曬口風希望Johnny可以回歸，又話自己同Johnny係好朋友，又傾過呢件事添！但係監製最後都有再補一句：「最終決定權唔喺我手上。」
 
本周新片有：
《查無此人》：陽光少女Amber孭住背包、帶住愛貓，遇上英俊年輕嘅業主 - 獸醫Ray，以為可以展開人生新一頁，點知Ray兼營嘅劏房集結各式蠱怪租客，並發生不可告人嘅巨額非法勾當。另一邊廂，郊野公園突然發現一具身份不明女屍，令警方偵查陷入查無此人離奇困局⋯⋯
 
《芙莉歐莎：末日先鋒傳說》：由兩大超人氣巨星：《后翼棄兵》（Anya Taylor-Joy）、《雷神奇俠》（Chris Hemsworth）攜手主演《Mad Max》電影系列最新一章。講述上一集強大角色芙莉歐莎起源故事。隨著文明世界崩解，年輕嘅芙莉歐莎從本來嘅家園「眾母綠地」中被軍閥綁走。當時兩大暴君爭奪統治地位，佢必須喺重重考驗中倖存下來，並透過各種手段搵到回家之路，展開連場驚心動魄歷險。而我地亦同電影台前幕後做咗一個獨家訪問。
 
Anya喺電影中有唔少飛車同時打鬥場面，但即使經歷完連串拍攝考驗，Anya就詰，自己最終都冇考到車牌，而拍攝期間都係喺其他器材下協助完成動作場面。不過自己都好期待可以考車牌，特別係特技駕駛嘅執照，因為實在太好玩喇！


而Chris喺拍攝前要為角色準備好一把獨特聲線，跑馬場面同海鷗叫聲都係觸發佢靈感嘅來源。而爺爺說話嘅極重鼻音腔調同聲線，以及馬戲團小丑嘅聲音都係佢模仿來源之一。而Chris玩聲越玩得多，就越有感覺，不過要演一個澳洲人，佢都要去好好幻想揣摩嗰個年代嘅澳洲人聲線，拿捏感覺。

芙莉歐莎其中一個標誌造型就係佢嘅剃頭Look，導演George Miller就認為，因為故事講述係三日內嘅事，而芙莉歐莎喺最後部分先會剃頭，整段戲只係佔幾個月拍攝嘅一個半星期，導演唔想Anya真係剃頭，如果要補拍之前嘅鏡頭會麻煩，而且Anya要留返長髮起碼要三至四年，所以就唔需要Anya剃頭喇！
 
近期香港旅發局集合一眾香港資深同新生代台前幕後，推出一條紀錄香港電影嘅紀錄片，將以往經典作品分為六大類港產片（愛情、功夫、警匪、動作、喜劇、文藝），從新拍攝成六條短片向港產片致敬。早前一眾演員同製作團隊亦去到康城影展首映，令更多人認識香港電影。
 
過去一星期嘅票房龍虎榜方面，截至5月22號中午，第三位《再繫「腦」朋友》，第二位《猿人爭霸戰：猩凶帝國》，第一位《九龍城寨之圍城》。