福祿壽訓練學院丨吳兆麟騷腹肌扮郭富城 評判伍仲衡直指似男妓

《福祿壽訓練學院》嚟緊26號播出嘅一集上演一對一扮嘢對戰，王祖藍嘅太太李亞男都帶埋兩位囡囡嚟捧場，仲有同囝囝嚟到電視城拍嘢嘅洪天明都有現身探班。當祖藍嘅囡囡被問到邊隊好睇啲？佢就投咗爸爸嘅敵方李思捷，祖藍仲笑指囡囡手指拗出唔拗入，不過佢就冇失望，因為囡囡轉頭又口甜舌滑咁氹返佢呀。

呢集仲搵嚟伍仲衡擔任評判，伍Sir話之前睇到一位參賽者極似郭富城，佢又講到自己對扮聲線要求好高，所以參賽者想得到高分絕對係唔容易。

伍Sir留意到扮城城好神似嘅彭建豪亦有上場，敵方上陣嘅吳兆麟就出動六舊腹肌迎戰，點知伍Sir就唔多欣賞，仲話有啲似男妓。平時有操開腹肌嘅吳兆麟聽到伍Sir評語就自覺係咪做多咗啲。而敵隊嘅葉泓聲都讚吳兆麟同城城有幾分相似，喺對方排練時仲有畀意見。

至於另一組對決係扮演劉德華，蔡景行喺李思捷助演下出戰，仲有多位男隊友化身《鹿鼎記》入面韋小寶嘅老婆，梁山山都話首次扮女人挑戰好大，任何嘢都覺得好神奇。