周吉佩赴英出騷拍MV 行程順利歸功全能太太

周吉佩早前遠赴英國擔任一個馬場活動嘅表演嘉賓，彈住結他上陣嘅吉吉喺台上相當有型，此行除咗有太太同行，仲有「吉S粉」到嚟支持打氣，吉吉都話呢次係好寶貴嘅經驗，如果唔係喺香港有工作，佢一定會同太太多留幾日周圍參觀。

吉吉話當日除咗有專程喺香港飛過去英國嘅「吉S粉」，仲有當地唔同地區嘅華人同香港人嚟到睇表演，畀佢一種異地演出但又充滿親切感。

此行除咗擔任表演嘉賓，吉吉順道喺倫敦街頭取景拍攝新歌MV，希望為MV帶嚟新鮮感。而一連串緊密行程得而順利完成，佢話一定要歸功太太。