神耆小子｜樊亦敏唱歌奔放被嫌棄 獲羅啟豪做啦啦隊打氣

樊亦敏(Amy)同鄭則士(Kent哥)主演劇集《神耆小子》有溫情同浪漫嘅一面，劇中更出現唔少懷舊歌曲，Amy喺歌廳演唱經典情歌《甜蜜蜜》嘅一幕令觀眾聽出另一番韻味。

為咗錄製呢首歌曲，Amy早前特意邀請中聲1嘅羅啟豪(Ramon)現身打氣支持，兩人早前喺節目《大笪地唱不停》中合唱《緣份》獲得好評，所以Amy就叫Ramon嚟聽吓佢唱歌畀啲意見，仲話見到Ramon令佢個心會定啲。

其實Amy歌喉一向唔差，喺訪問時佢仲即席騷歌喉，獻唱咗一段歌曲，身旁嘅Ramon都大讚好聽，Amy笑指：「我當然未必唱得人哋咁好聽，但好唔好聽，會因為Ramon打氣打得好唔好。監製好有要求，打嚟同我講話我上次大笪地唱法好奔放，今次係要有女人味，聽完我都停頓咗幾秒，雖然我有信心，但難免會緊張。」