羅毓儀開拍愛回家度過28歲 獲同事貼心送玩具蛋糕感窩心

羅毓儀Yuki 喺啱啱過去嘅5月23號度過28歲生日，雖然生日正日要工作，喺公司開拍《愛．回家之開心速遞》，但壽星女Yuki一啲都唔介意，期間仲收到演員們好似葉蒨文Sophie 、 李偉健 同 歐瑞偉 都有送上小心意畀Yuki，令佢特別興奮。

Yuki坦言生日最緊要有工開，寓意長做長有，同時感受到演員嘅暖心，並開心展示手上嘅玩具生日蛋糕，一臉滿足嘅Yuki話：「好多謝愛回家嘅同事們，搞到我真係好愛回家。」

Yuki正日生日收工後會同屋企人食飯度過，當然唔少得切蛋糕嘅環節啦，不過早喺未踏入生日之前，Yuki已經收到多方面嘅祝賀，仲食咗至少五個蛋糕，難怪佢笑笑口話覺得年紀漸長新陳代謝變慢，以前食完瞓醒就冇事，依家開始長出小肚腩，要好好Keep Fit。