譚輝智推新歌唱出夫妻情 為演唱會密密操肌變大隻佬

中聲2嘅人氣王譚輝智喺比賽中獲得亞軍後出道，短短不足三個月，唔單止率先彈出宣布舉行處男騷，更首次以歌手身份踏足錄音室，錄製第一首個人歌曲《多麼感激》，面對眾多突如其來嘅機會及挑戰，輝智都覺得好夢幻同興奮，因為終於實現到多年來嘅歌手夢。

講到新歌內容同主題，輝智指自己較喜歡情歌，歌曲嘅監製特別圍繞輝智同老婆去製作，關於夫妻情深一面，喺演唱會當晚輝智就會首度公開演出新歌。

為咗演唱會，輝智除咗努力練歌、排舞之外，仲默默操肌變大隻佬，訪問時佢都不忘展現辛苦得嚟嘅老鼠仔，真係手瓜起𦟌﹗

雖然輝智首次以歌手身份錄音，心情特別緊張，但擔任輝智音樂監製嘅張家誠，就對輝智嘅表現相當滿意，大讚佢狀態大勇之餘，仲覺得輝智嘅發揮畀到佢一個大驚喜，聽到歌聲簡直觸動心靈。