周嘉洛自認聰明未試過被騙 鬼馬修哥笑指只有嘉洛呃人

日前喺澳門開騷破咗亞洲最高齡開騷演出者紀錄嘅修哥胡楓，精神奕奕同埋周嘉洛一齊出席一個由銀行舉辦嘅防騙活動，一齊邊飲茶一邊向老友記宣揚防騙資訊，甚至連品嚐嘅點心都有防騙訊息喺入面，修哥特別推介一款叫「亂撳link就棗糕」。

身邊嘅嘉洛就話自己好聰明，從來都唔會被騙，鬼馬嘅修哥就話只有嘉洛去呃人，嘉洛就尷尬話「呢個又唔係，我唔係啲咁嘅人。」修哥仲話呢次活動係三贏，因為佢贏、嘉洛贏，仲有大家贏。佢哋仲為咗活動拍咗五條宣傳片，嘉洛就自爆有句對白不停甩，搞到修哥不停食餃，修哥都話啱啱見到隻餃都有啲厭。