福祿壽訓練學院｜1對1對決模仿城城華仔 零經驗鬥廿年專業戶

聽晚播出嘅《福祿壽訓練學院》第7集，係「1對1扮嘢對決」第二回合，三組將輪流自行挑選一名藝人作為扮嘢主題，然後向指定組別下戰書進行1對1PK賽，呢個回合亦繼續保留導師、學員嘅助演部分，現場觀眾同專業評審伍仲衡會負責第二回合評分。

由於祖藍喺上一集嘅第一回合對決贏到開巷，節目一開始佢就被祥師兄抵死寸爆：「我睇你好得幾耐。」祖藍聞言亦爆笑指自己「贏分數失民心」，仲話就連化妝姐姐亦認為佢「贏得冇道理」。

上集橫掃全場嘅祖藍，今集係咪可以繼續大勝呢？

第二回合Team Fuk為收復失地，祥師兄派出最強武器：有20年扮演郭富城經驗嘅 彭建豪 出戰；仲選擇全隊零郭富城模仿經驗嘅Team Luk對戰。喺廿年扮演生涯中，以跳唱為主嘅彭建豪，今次轉為挑戰深情慢歌《我為何讓你走》，順道獻予三位陪伴自己多年嘅「天王」 拍檔—嘉傑(黎明模仿者)、楊彥偉(張學友模仿者)仲有梁德華(劉德華模仿者)。

彭建豪有20年扮演郭富城嘅經驗

建豪話：「以前我哋係四個人一齊去內地好多電視台錄節目，可能大家都有一定年紀，有自己各自嘅家庭同工作，依家我自己一個人嚟TVB，心裏面好感觸。」同郭富城有90%相似嘅建豪深情獻唱完畢後，仲非常勵志熱血咁話：「希望大家會記住我個名，我係歌手彭建豪。」場面感人。

佢同幾位好友都有多年嘅四大天王扮嘢經驗

伍仲衡亦對彭建豪嘅表演亦讚不絕口：「我喺電視睇完你，就好想睇呢個節目，你比郭富城更加郭富城，我相信得一個人可以PK到你，就係郭富城。」思捷聞言亦力撐話：「可能有人話：『唓，佢扮咗二十年啦，扮嚟扮去郭富城。』扮得似就係扮得似，你扮嚟睇吓吖，你係最似嗰個。」

而祖藍就派出外形同聲線都同郭富城爭一截嘅吳兆麟(Alan)應戰，Alan唯一模仿郭富城信心位，就係自己嘅「狂野之城冬菇頭」。不過經過祖藍連日嘅調教，逐個動作細節執到足之後，更向Alan大派「致勝錦囊」：「唔好加太多嘢，加太多你變得好忙。大家搏係搏你個樣似過另嗰邊嗰位郭富城，咁你嗰啲位一定要畀個空間佢出嚟(要畀鏡頭影到個樣)，你要有個明星停頓位。」

相對零模仿城城經驗嘅Alan，就惟有搏命操練喇

經過特訓嘅Alan，跟足城城《第四晚心情》經典裝束出場，大晒超強胸肌同「朱古力腹肌」，加上一對超結實兼壯碩嘅大髀，未開跳已經震撼全場。本身有拉丁舞底子嘅佢，雖然跳唱流行曲經驗欠奉，但配以地獄式操練，成功憑超強「舞」功同身形一鳴驚人，加上大量自摸、單眼、震胸同扭腰擰臀動作，全場尖叫同歡呼聲都不絕於耳，絕對有能力同「扮郭富城專業戶」彭建豪一決高下。

呢集佢會大騷強勁肌肉演出《第四晚心情》

就連出名閹尖嘅伍仲衡亦讚不絕口：「你真係跳得好好，我略嫌有少少似鴨，好輕微架啫，尤其係你嗰幾吓(邊說邊扭腰擰臀)，好似想人塞錢落你個褲咁，郭富城唔會咁架嘛。如果你能夠再收番嗰少少哩，就係舞台王者，依家就鴨店王者喇。」爆笑全場。

本集另一個對決題目，係Team Luk自選嘅「劉德華」，應戰嘅Team Sa，撞樣90年代劉德華嘅陳柏曦決戰撞樣80年代劉德華嘅蔡景行，兩人分別表演《天若有情》同《鹿鼎記》， Team Sau 更以「人海戰術」增加勝算。想知「兩代華仔」戰況，記得留意星期日晚嘅《福祿壽訓練學院》。

蔡景行就會扮演劉德華《鹿鼎記》中嘅造型

《福祿壽訓練學院》星期日晚 20:30 翡翠台