開卷｜蔡瀾作客《開卷》暢談與老友倪匡軼事 展現才子機智一句KO主持伍韻婷

長壽節目《開卷》今晚將播出第100集，為隆重其事，節目邀請「香港四大才子」之一嘅蔡瀾擔任重量級嘉賓。對於被封為「香港四大才子」，蔡瀾竟然掩面嗌怕醜，大晒可愛一面！節目中Patrick Sir為觀眾推介蔡瀾著作嘅散文集《老友寫老友》，內容圍繞蔡瀾同老友倪匡嘅相處軼事，而蔡瀾就為觀眾推介自己嘅著作《在邵逸夫身邊的那些年》。

蔡瀾為《開卷》第100集擔任嘉賓
 
講到同為「香港四大才子」嘅老友倪匡，蔡瀾笑言：「佢唔係人嚟㗎，佢係外星人。」佢話好掛念倪匡：「可以傾得埋嘅人，其實呢個世界唔係幾多。」Patrick Sir問到書中所寫嘅是否都係真事？蔡瀾笑言：「倪匡先生一向都話真定假唔緊要，男女之間都大把嘢寫啦，佢話你睇我個妹(亦舒)，食咗咁多年老本！」之後Patrick Sir講到蔡瀾先生嘅寫作風格簡而精，蔡瀾就坦言：「想畀多啲(嘢)人哋睇，你就唔應該寫人哋唔明嘅嘢。」蔡瀾仲喺節目中大方分享「家傳寫作秘笈」，萬勿錯過！

故友倪匡嘅故事講極唔完
 
Juliana問到蔡瀾是否享受寫作？蔡瀾話：「唔享受寫嚟做乜？」唔認輸嘅Juliana再話：「寫嚟搵錢。」蔡瀾就回應一句：「錢我夠多喇。」淡淡然一句說話就KO咗Juliana，場面搞笑。蔡瀾又話鍾意讀書人有一種特別嘅面孔：「呢個面孔好犀利，去到邊都可以蝦太俗氣嘅人。」蔡瀾講完仲同一眾主持Chok讀書人嘅樣合照，非常過癮。

Juliana被蔡生一句KO
 
《開卷》來到100集，一眾主持大玩Q&A解答網友提問，其中一條問題：「其實介紹啲書係咪真係有睇」，Patrick Sir回應謂：「其實我哋真係全部自己睇，係冇稿跟㗎！」Juliana就笑言：「所以先做得咁輕鬆，有稿就Bye Bye㗎喇！」想知網友其他精彩留言，記住留意26號晚播出嘅最新一集。

《開卷》星期日晚 19:30 TVB Plus(82台)