Eason巡唱100場杭州台上灑淚 承諾返港再唱回憶難忘片段

陳奕迅 2022年底由香港開始舉行嘅《Fear and Dreams演唱會》，一直巡迴世界各地，近日杭州站6場演出更突破第100場。不過一慶祝完呢個特別日子，Eason就因為不適而臨時取消今、明(25與26號)兩場演出。

身穿便服嘅Eason，由主辦單位負責人陪同下，晚上7時多現身舞台，經忍唔住抹眼睙、滿眼通紅聲音沙啞嘅Eason向台下觀眾鞠躬道歉，佢指自己生病、經醫生勸喻下，一定要休息，無奈宣佈演出取消，演唱會將延至星期一(27號）同星期二(28號)補場。

觀眾可以選擇退票，或持原票入座，而外地歌迷嘅費用將由主辦單位承擔。現場有歌迷一齊落淚，亦有大部份歌迷表示唔會退票。

Eason話：「 大家好，昨天完成了100場演出，今天起來的時候，我本來是帶著很興奮的心情去跟你們度過這個周末，但是我很抱歉，要讓你們失望了。今天下午四時，我如常的跟樂隊和舞蹈員彩排，彩排後發現身體出現了一些狀況，後來越來越嚴重，到下午六時，我就感覺到身體的問題令我今天不能演出。」

Eason因為不適而要押後兩場演出

我也很想做到歌詞里面說的：「‘That’s just life 笑對現實的無奈’但現實是我做不到，至少這一刻我做不到。可能我平常都經常開玩笑，可是這次我卻笑不出來，但這次真的不是開玩笑，是確實的無奈。」

佢晚上同主辦單位代表現身向觀眾交代

「不幸的事情是會發生的，我必須分享這個壞消息。我很想跟你們度過這3小時的時光，但醫生的建議是，我的聲帶必須要休息。今天和明天的門票暫定會延期至星期一及星期二，具體的事務主辦方上海聖峰演藝文化會詳細公布。再一次，我真誠的跟大家說一聲抱歉。」

終於唱至第100場。一班工作人員於綵排時，就同Eason切蛋糕慶祝，而正式演出唱到《任我行》時，Eason更因為觀眾令佢太感動而淚灑舞台。

第100場演出於杭州舉行，當地為慶祝更於錢塘江邊一共36棟大廈上，上映巨型海報燈光騷。Eason抵埗後上船欣賞夜景，先知道有呢一幕意外驚喜，令佢非常開心。而Eason亦為一班奮鬥多時嘅工作人員，每人準備一件紀念外套同T-Shirt，更親手寫上大家嘅名作禮物，又額外送出「百場利是」以表感謝。

Eason為工作人員準備紀念T恤同外套，仲一一寫低佢哋嘅名

呢日綵排時，大家一齊喺舞台大合照留念，又切蛋糕慶祝，更以大銀幕回顧過往100場嘅難忘時刻。Eason感動話：「好彩有人發明咗攝影機拍低晒，對我嚟講真係好開心，大家都好勁，每人嘅崗位都好重要，呢個演出無咗任何一個人都唔會成事！我要讚大家，你哋每一個喺我心目中都好緊要，感激大家為呢個騷付出 ，喺我無力時，我會諗起咁多人喺我後面，為我一個人同心合力做好呢個騷，你哋一個眼神，拍一下我膊頭，我都好感激，好多謝，令我變返有力。」

綵排時大家一齊切蛋糕慶祝全體工作人員一齊拍攝難得嘅大合照

有吹神稱號嘅佢繼續話：「喺呢行我哋做咗咁耐，就唔會特別諗幾多場，但係今日睇返呢100場經歷嘅小短片，覺得真係一件好感動、好美妙、奇妙嘅事。好多謝由疫情到今日同我一齊參予過呢個騷嘅每一位工作人員，當然仲有每一位入場觀眾。 100場裡面最Fear係咩？可能係『澳門』，病咗、覺得聲帶有事、個騷又要延期.....做完新加坡中咗Covid-19都冇澳門咁Fear，仲有去台北之前因為太緊張胃痛咗一個星期，哈哈。最Dream係咩？台北場啦，每一場都好夢幻、好美滿同開心，北美之行都好夢幻，因為第1次6場都喺籃球場Arena唱，因為要搬運舞台等時間關係，留咗喺美加一段長日子，期間好似去旅行咁，可以放鬆休息下，又可以見返好多好耐冇見嘅老朋友，嗰種感覺一樣好夢幻同開心。其實唔係淨係台北、美加，每個地方都比咗好多難忘回憶我，宜家諗返都真係數唔晒。」

杭州當地亦以非常特別嘅方式歡迎Eason開騷

出道至今已經開過近400場個人演唱會嘅佢，又提到會重返香港再唱，不過就要等各站先完成喇。Eason仲指喺台上爆喊，係因為人越大就變得感性，本來以為日日都一樣，但係就發現原來真係唔一樣呀。

雖然巡演仲有多站演出，不過Eason就指一定有機會再喺香港為大家演出咁話