區瑞強開騷自爆做爺爺 吳大強著蘇格蘭裙破格登場

區瑞強 (Albert)一連兩場演唱會24號正式開騷，Albert為同歌迷同歡，呢次更將票價定得非常親民。而演唱會亦座無虛席，Albert為大家連唱多首經典曲目，令歌迷聽得如痴如醉。而喺呢個開心晚上，甚少同大家分享家事嘅Albert亦宣布咗一個好消息，就係佢已經榮升做爺爺，令大家都為佢拍手歡呼！
 
至於為Albert擔任唯一一位演唱會嘉賓嘅中聲歌手 吳大強 呢晚歌衫非常破格搶眼。事關吹住口琴出場嘅大強身穿蘇格蘭裙，而呢身裝扮更係專程喺當地運到香港。同Albert合唱《Amazing Grace》後，大強更上演喺台上即場換衫一幕，成件事就好似變魔術一樣。
 
Albert同大強雖然相識時間唔長，不過彼此惺惺相惜，非常欣賞對方。大強更謙稱自己對住Albert時，係一名新人。而講到挑戰四面台感受時，大強就覺得機會難得，亦好多謝Albert邀請自己做嘉實。
 
呢晚Albert嘅世侄女范明熙亦喺開騷前為Albert同大強獻花送驚喜，Albert亦大讚范明熙係一個唱歌好聽嘅後輩。