與陳靜林芊妤貼身運動裝騷身形 陳凱琳同鄭嘉穎打波好勝心強

呢日 陳靜 陳凱琳 同 林芊妤 三位女神齊齊以貼身運動裝出席活動，大騷健美身形。Dada喺熱播劇《家族榮耀之繼承者》中飾演嘅丘家大少奶，氣場十足，引起唔少討論，首次演出30集長劇嘅Dada就話好鍾意呢個劇本，尤其故事好多部分由女性角色主導，有新意之餘亦都特別有意義。

Grace呢排成日喺社交平台分享同小朋友行山、攀石等等嘅相，佢話近期愛上戶外運動，仲同老公鄭嘉穎一齊迷上一種新興嘅球類運動叫Pickleball，兩公婆一齊進行，邊運動邊拍拖，應該好浪漫，不過Grace就自爆，原來自己打波嗰陣都幾好勝，有時嘉穎都忍唔住詐型呀！

而身為今次活動主辦方嘅Coffee就話，因為天氣關係，活動舉行可謂一波三折，由於已經延期兩次，所以第三次就算天候不佳都決定照做。創業有成嘅Coffee個人品牌越做越大，做生意嘅頭腦就好似佢做瑜伽一樣咁叻呀！