芷珊約您｜陳慧琳曾憂鬱擔心事業玩完 爆獲亞太區女歌星獎小秘密

由 黎芷珊 主持嘅《芷珊約您》今晚會播出第6集，芷珊會北上廣州直擊潮媽 陳慧琳 巡迴演唱會，包括騷前綵排情況，以至後台重地的quick change地方，製作組都一一記錄，又進行深度對話。Kelly向來真性情，貴為一代天后絕無架子，其毅力值得敬佩。

Kelly今次巡唱要挑戰多首快歌，自認從小不擅記舞步嘅佢，笑言經常喺屋企家對住雪櫃練舞，又話連換表演服裝都要練近百次，真係對每一個細節都一絲不苟。對自我要求極高嘅Kelly，每逢開騷前必定閉關不出門，兩日前更封嘴養聲，務求以百分百最佳狀態演出：「我咁辛苦，就係想喺台度畀最好嘅大家，要100%做到投入先得，爭8%都唔得！」

陳慧琳今晚將現身《芷珊約你》，分享經過幾年休整後再辦演唱會感受

Kelly原定計劃喺2018年舉行巡唱，可惜遇上疫情一度擱置，佢反而利用咗呢段時間學唱歌增值自己。不過疫情幾年間卻是Kelly最不快樂的日子，自爆肥足近20磅唔敢見人，推掉工作，加上時間流逝令佢感到迷茫：「我係咪就咁玩完？全世界係咪就咁玩完？一年一年咁過去，（年齡）由4字頭變5字頭，我老喇！」直到2022年香港電影金像獎頒獎禮「復出」幕前，Kelly坦言目前人生階段好快樂：「依家做到我想做嘅野，好自然、好舒服繼續行我嘅人生。」

Kelly一度擔憂自己狀態不佳而失去自信

Kelly喺2001年起連續六年奪得「亞太區最受歡迎香港女歌星」，天后地位毋庸置疑，佢話當年樂壇爭獎氣氛激烈，並大爆有一年曾洩漏風聲指Kelly會奪獎，但最後獲獎卻是另一位女歌手：「記得有一次唔知邊個台，同唱片公司高層講係Kelly架喇，跟住後尾冇咗，咁梗係有人……唔知做乜啦，總之冇咗，我仲要安慰番唱片公司嘅人。」不過Kelly覺得作品喺歌迷心中嘅反應，比獎項更重要，最緊要每年有幾多隻好歌，歌迷又鍾意。

節目會深入後台了解天后開騷前嘅幕後情況

Kelly喺2008年紅館演唱會尾場宣布婚訊，其後淡出樂壇專心相夫教子，曾憂慮結婚生子後事業大不如前：「諗住結完婚生完仔，應該冇啦，喊晒咁走架嘛！生完一個再一個，啲人都仲OK喎，原來觀眾接受能力咁高。」Kelly感恩歌迷多年仍不離不棄，歌迷開心成為佢嘅動力，會繼續唱下去。

Kelly仲公開指會繼續唱落去

巡迴演唱會圓滿結束後，芷珊與Kelly貼地食大排檔，罕有談及與15歲大仔「蝦餃仔」劉昇同12歲細仔「小籠包」劉琛，出生富裕家庭的佢，公開對金錢價值觀，節目仲有更多Kelly鮮為人知嘅小秘密，密切留意《芷珊約您》。

《芷珊約您》星期日晚 21:30 翡翠台